ይህ ትግል ዘመን አልፎ መጭው ትውልድ መለስ ብሎ የዘመኑን ትግል ታሪክ በሚመረምርበት ጊዜ የኢትዮጵያ ተማሪዎች በመራራ ትግላቸው የፃፉት ገፅ በኢትዮጵያ ጭቁኖች የትግል ታሪክ ውስጥ አሸብርቀው ከሚታዩት ገፆች አንዱ እንደሚሆን አንጠራጠርም። ባለፉት አመታት የኃይለሥላሴን አገዛዝ ከተለያዩ አቅጣጫዎች፣ በተለያዩ ቦታዎችና በተሰበጣጠሩ ዓለማዎች እየተነሡ ያዋከቡትና ያዳከሙት ብዙ እንቅስቃሴዎችና ሕዝባዊ ትግሎች ነበሩ። ነገር ግን በተለይ ከሃያ ዓመታት ወዲህ በኢትዮጵያ የፖለቲካ መድረክ ላይ ብቅ ያለው አብዮታዊው የኢትዮጵያ ተማሪዎች ንቅናቄ ከነዚህ እንቅስቃሴዎች ሁሉ ዓይነተኛ የሚያደርጉት ጠባዮች ነበሩት። በመጀመሪያ  የኢትዮጵያ ተማሪዎች ንቅናቄ ከየአቅጣጫው፣ በየቦታውና በተሰበጣጠሩ ዓላማዎች ከተነሱት ተቃውሞዎች ዘልቆ እነዚህን ሁሉ በሚያስተባብሩ አጠቃላይ መፈክሮች ሥር የሚንቀሳቀስ አገር አቀፍ ንቅናቄ ነበር። ሁለተኛ ደግሞ የኢት. ተማሪዎች ንቅናቄ ሃገራችን የደረሰችበትን የህብረተሰብ እድገት ደረጃ ጠንቅቆ ያወቀ፣ የፊውዳሊዝምንና የኢምፔሪያሊዝምን ቀንደኛ ጠላትነት የተረዳ፣ እነዚህ ጥንድ ጠላቶች ከኢትዮጵያ ምድር ካልተደመሰሱ፣ ለሃገራችን ዕድገት ለኢትዮጵያ ጭቁኖች እርምጃና ነፃነት፣ እንደማይገኝ ጠንቅቆ የተገነዘበ አብዮታዊ ንቅናቄ ነበር። እንደዚህም በመሆኑ በዚህች ምንም ዓይነት የተደራጀና ሃገር አቅፍ የሆነ የፖለቲካ ታቃውሞ ትግል በማታውቅ አገራችን የተማሪው ንቅናቄ አገር አቀፍነትና አብዮታዊነት፣ ላለፈው የተማሪ ትውልድ ከሌሎች አገሮች የተማሪዎች ንቅናቄዎች የበለጠ ኃላፊነት ጥሎበት ቆይቷል። ታጋይ ኢትዮጵያውያን በኢትዮጵያ ተማሪዎች ንቅናቄ ዘላለማቸውን ሲኮሩ የሚኖሩት ይህ የተማሪ ትውልድ ይህንን ከፍተኛ ሃላፊነት በለጋ ትከሻው ላይ ተሸክሞ ታሪክ ለጣለበት አደራ ብቁ መሆኑን በማስመስከሩ ነው።

በነዚህ የትግልና የመስዋዕትነት ዓመታት ይህ የተማሪ ንቅናቄ ኃይለሥላሴ ፋሽስታዊ አገዛዝ ባሳለፉት ፀረ ሕዝብ ኃይል በምንም ሳይፈታ “መሬት ላራሹ” “ዲሞክራሲያዊ መብቶች” “የብሄረሰቦች እኩልነት”፣ “ብሄራዊ ነፃነት” እያለ ብዙ የከፈለበትን ትግል አካሄደ። ነገር ግን ይህ ትግል ወደፊት እየገፋ ሲሄድና በአጠቃላይ የሥርዓቱ እየበሰበሰ መሄድ በያለበት የሕዝቡን ትግል ሲያስፈጽመው በተማሪው ንቅናቄ ውስጥ በግንባር ቀደምነት ለተሰለፈውና ማርክሲዝም ሌኒኒዝምን እያዋሀደ የትግል መመሪያው ማድረግ ለጀመረው የመጀመሪያው የኢት. ማርክሲስት ሌኒኒስት ትውልድ አንዳንድ ነገሮች ግልጽ ሆነው መታየት ጀመሩ። በመጀመሪያ እነዚህ ግንባር ቀደም ኃይሎች በመቀጣጠል ላይ ያለውን የኢትዮጵያ ጭቁኖች የነፃነት ተጋድሎ ከዳር እስከዳር አስተባብሮ ለመምራት ይቻል ዘንድ ይህ ታጋይ ትውልድ ከተማሪው ንቅናቄ ባሻገር የማደራጀትን ጉዳይ ካሁኑ መያያዝ እንዳለበት ተገነዘበ። ሁለተኛ ከላይ የተጠቀሱትን ዓላማዎች ከሥራ ላይ ለማዋል ለሚደራጁትና ለመሰለፉት ኃይሎች ሁሉ የተጣራና አብዮታዊ አመራር ሊሰጥ የሚችለው ኃይል በማርክሲዝም ሌኒኒዝም ርዕዮተ ዓለም የሚመራ ድርጅት መሆን እንዳለበት አመኑበት።

ከዚህ እምነት በመነሳት በአገር ውስጥ፣ በአውሮፓ፣ በሰሜን አሜሪካና በቅርብ ምሥራቅ የኢትዮጵያ ተማሪዎች ንቅናቄ ውስጥ በግንባር ቀደምነት ከተሰለፉትና የድርጅትንም አስፈላጊነት ሆነ የማርክሲዝም ሌኒኒዝም መርህ ተቀብለው ትግሉን ከተማሪው ንቅናቄ ባሻገር ለመቀጠል በታሪክና በኢትዮጵያ ሕዝብ ፊት ሃላፊነትን በተቀበሉ አብዮታውያን ተሳትፎ በነሐሴ ወር 1960 ዓ.ም. በሃምቡርግ ከተማ በምዕራብ ጀርመን በተደረገው የመመስረቻ ጉባዔ ላይ የመላ ኢትዮጵያ ሶሻሊስት ንቅናቄ ተቋቋመ።

ይህ በስመ ጥሩ የኢትዮጵያ ተማሪዎች ንቅናቄ ውስጥ ተፀንሶ በጊዜው በሃገሪቱ የሚገኙትን ማርክሲስት ሌኒኒስቶች አስተባብሮ የያዘው የመላ ኢትዮጵያ ሶሻሊስት ንቅናቄ ሲመሠረት ጀምሮ ዓላማዬ ብሎ የያዘው፣ ሰፊው የኢትዮጵያ ሕዝብ በረዥም ጊዜ የትግል ታሪኩ ያገኘውን ቆርጥነትና ልበሙሉነት፣ ታታሪነቱንና በራስ የመተማመን ኩራትን፣ ተመፅዋችነትንና በማንም ይሁን በማን ፊት የበታችነትን አሻፈረኝ ሲል የቆየ አመፀኛነቱን፣ በአጭሩ በዓለም ሕዝቦች ሸንጎ የማይናቅ ማንነቱን በሚያድስበት የብሄራዊ ነፃነትና ትግልና ይህችን ሃገር የሰላምና የእኩልነት የነጻነትና የብልፅግና ምድር በሚያደርጓት ሕዝባዊ አብዮታዊ ትግል ውስጥ የግንባር ቀድሞ ድርሻውን ለማበርከት ነበር።

የመላ ኢትዮጵያ ሶሻሊስት ንቅናቄ ታጋዮች ገና በዚያ በኃይለሥላሴ ዘመን ይህንን ግልፅ ዓላማ ይዘው ሲነሱ ለዚህ ታላቅና ክቡር ግብ ተመጣጣኝ የሆነ መስዋዕትነትና ፈተና እንደሚጠብቃቸው እያወቁ ነበር። ትግሉ መራራና ረዥም እንደሚሆን፣ ብዙ ውጣ ውረድ እንደሚበዛበት፣ መውደቅ መነሳት እንደሚፈራረቅበት ይገነዘቡ ነበር። ስለሆነም አንዳንዴ እየበረደና ጨርሶ የተዳፈነ እየመሰለ፣ አንዳንዴ ደግሞ እየተጧጧፈ ምንግዜም መክሰምን ሳያውቅ ለኢትዮጵያ ነፃነትና ክብር በሚደረገው በዚህ የማያቋርጥ ተጋድሎ ውስጥ አንዴ ይህንን  የትግል ስልት፣ ሌላ ጊዜ ደግሞ ያኛውን ታክቲክ እየተጠቀሙ ጊዜና ሁኔታን እያየ በሚለዋወጥ ስልት ምንም ጊዜና ምንም ሁኔታ ሊለውጠው በማይገባው ቆራጥነትና ታታሪነት መታገል አስፈላጊ መሆኑን አንድም ቀን ስተውት አያውቁም። እንደዚህም በመሆኑ መኢሶን አብዮታዊ ጥራቱንና ወኔውን ምንግዜም ከማይላሽቀው የታጋይ አባላቱ የሃገር ፍቅር ስሜት ጋር እያስተጋገዘ መዝኖና ፈቅዶ በጀመረው የትግልና የመዋዕትነት ጎዳና ረዥም ጉዞውን ተያያዘው።

ነገር ግን ይህ የመጀመሪያ የኢትዮጵያ ማርክሲስት ትውልድ ለዚህ ዓላማ በዚህ ቆራጥነት ተደራጅቶ ትንሽ መራመድ እንደጀመረ መደባቸውን ሙሉ በሙሉ ከድተው ከወዝአደሩና ከአርሶአደሩ በተደባለቁትና የነፃነቱን ትግል ረዥም ጉዞ ለመያያዝ በተነሳሱት አብዮታዊ ምሁራንና ከሕዝቡና ከአብዮቱ ቀድመው በአቋራጭ ለሥልጣን በቋመጡ፣ የነፃነት ተጋድሎ የሰፊው ሕዝብ የረዥም ጊዜ ተጋድሎ ሳይሆን የጥቂት ግንባር ቀደም ነን ባዮች የአንድ ሰሞን ውርውር መስሏቸው በተቅበጠበጡ፣ ለዚህ ለመራራው ትግል መደባዊ ትዕግሥቱም ሆነ ወኔው፣ ኢትዮጵያዊ ሃገር ፍቅሩም ሆነ አብዮታዊ ጥራት ቶሎ ብሎ በከዳቸው “አጭር ጉዞኞች” መሃከል ከፍተኛ የመሥመር ትግል ተጀመረ። በዚህ ትግል “የአጭር ጉዞኞቹ” ክንፍ በመኢሶን ውስጥ ሥር መስደድ የጀመረውን ሃቀኛ መሥመር ማሸነፍ ስለተሳነው የዚህ የቀኝ ክንፍ ንዑስ ከበርቴ አዝማሚያ መሪዎች በነሐሴ ወር 1963 ዓ.ም. ከመኢሶን መገንጠላቸውን አስታወቁ። ጥቂትም ቆይተው በሚያዚያ ወር 1964 ዓ.ም. በበርሊን ከተማ በኢትዮጵያ ጭቁኖች ትግል ውስጥ ታሪክ የማይረሳቸው ወንጀሎች ከፈፀመ በኋላ እንደገለባ እሳት ቦግ ብሎ የጠፋውን “የኢትዮጵያ ሕዝባዊ አብዮታዊ ፓርቲ” የተባለውን ስም ጥፉ ድርጅት መሠረቱ።

በቅድመ አብዮት ኢትዮጵያ በተለይ በውጭ ሃገር ተማሪ ማህበራት አማካኝነት ከየካቲት በኋላም በይፋ በመኢሶንና በኢህአፓ መሃከል የተደረጉትን ትግሎች መላው  ኢትዮጵያ ሕዝብ ያውቃቸዋል። በዚህ ትግል በመጀመሪያ ላይ ባላቸው “ዓይን ሳቢ” መፈክሮችና በተሰበጣጠሩ ምክንያቶች ከተለያዩ የውጭ ኃይሎች ከሚጎርፍላቸው የማቴሪያል ድጋፍ የተነሣ ኢህአፓ ገናና መስሎ ይታይ እንደነበር ማንም አይረሳውም። ነገር ግን ይህ የአድሃሪያን ጊዜያዊ ማየል በሃቀኛ መሥመሩና በኢትዮጵያ ሕዝቦች እያደረ መንቃትና መደራጀት ተማምኖ ትግሉን ለቀጠለው መኢሶን አስደንጋጭ ነገር አልነበረም። የኢትዮጵያ አብዮት ፍጥነት፣ የጭቁን ሕዝቦቿ ከትግላቸው እየተማሩና እየነቁ መሄድ፣ ለመኢሶን የዚያኑ ያህል የዕድገትና የመለምለም ጎዳና ሲከፈትለት በዚያው ልክ ደግሞ በውጭ ኃይሎች የማቴሪያል ድጋፍ ከኢትዮጵያ ጭቁኖች የትግል ዕድገት ደረጃ ባልተመጣጠነ ሁኔታ “አብጦ” የቆመው ኢህአፓ እየተዋረደና እየከሠረ ሄደ። በአጭር ጊዜ ውስጥም ከለየላቸው ፀረሕዝቦች ጋር በመዳበል በአብዮቱ ላይ የኪሣራ ምልክቱ በሆነው ፀረሕዝብ አመጽ ተሰማርቶ የብዙ ሰማዕታት ደም የከፈልንብትን ግን ደግሞ ከአብዮታዊ አቋማችን አንዲት ስንዝር ፈቅ ያላደረገንን የሽብር ፈጠራ ዘመቻ ተያያዘው። ይህ አዲስ ምዕራፍ ግን የኢትዮጵያ አብዮት ወደፊት ከመራመድ፣ መኢሶንንም ከመለምለም የኢህአፓንም ቅጥረኞች ወደ ታሪክ ትቢያ መጣያ እየተደፉ ከመውረድ አላገዳቸውም።

በኢትዮጵያ አብዮት ሂደት ውስጥ ያለውንና በየጊዜው የሚቀያየረውን የኃይሎች አሰላለፍ እያዘመነ ታክቲኩን የሚቀይሰው መኢሶን በአንድ በተወሰነ የታሪክ ወቅት ንኡስ ከበርቴ ደርግ ያለውን የተወሰነ ተራማጅ ሚና በመገንዘብ በተለይ ከ1968-1969 ከጊዜያዊ ወታደራዊ መንግሥት ጋር ጊዜያዊ የትግል ህብረት በመፍጠር ሰፊው ሕዝብ በንቃት በድርጅትና በትጥቅ ጎዳና ላይ እንዲገፋ ከፍተኛ ተጋድሎ አድረጓል። ነገር ግን ይህ ንዑስ ከበርቴ ደርግ በኢትዮጵያ ጭቁኖች አብዮታዊ ትግል መግፋት ተደናግጦ የሕዝቡን ሠፈር መክዳት ሲጀምርና ከርሱ በስተቀኝ ከነበሩ ኃይሎች ጋር ህብረት ፈጥሮ፣ የኢትዮጵያን ብሄራዊ ዲሞክራሲያዊ አብዮት እየከዳ፣ ብሄራዊ ነፃነታችንን ከከፍተኛ አደጋ ውስጥ እየከተተው ሲመጣ፣ መኢሶን ከጊዜያዊ ወታደራዊ መንግሥት ጋር በቅልበሳ፣ በክህደትና በብሄራዊ ውርደት ጎዳና አልነጎደም። በነሐሴ ወር 1969 ዓ.ም. የትግል ስልት ለውጥ በማድረግ ስፍር ቁጥር የሌላቸውን ሌሎች ጓዶችና ጓዲቶችን የሰዋበትን በኢትዮጵያ ጭቁኖችና በታሪክ ፊት ቃል የገባበትን ዓላማ አንግቦ የግንባር ቀደምነት ጉዞውን ቀጠለ።

በዚህ ወቅት ደግሞ የመኢሶንን ሀቀኛ አብዮታዊ መሥመር ለመዋጋት ሌሎች የታሪክ አተላዎች ተነሱ። እየተጠናከረ በመጣው ፀረአብዮት ፊት በመንበርከክ፣ አብዮትንና የእናት አገርን ክብር ለፍርፋሪ በመሸጥ በጠላት ፊት ካጎበደዱበት የቀኝ አደርባይ ድርጅቶች ጋር ሌላ ዙር የመሥመር ትግል ተካሄደ። ነገር ግን የሰፊው የኢትዮጵያ ሕዝብ ንቃት ከፍተኛ ደረጃ ላይ በሚገኝበት በዚህ ወቅት የቀኝ አደርባዮችን ጨርሶ ለማጋለጥ የጥቂት ወራት ትግል እንኳን አልፈጀም። በዚህም ትግል የቀኝ አደርባዮች ልክ እንደ ኢህአፓ ሙሉ በሙሉ ርቃናቸውን ከቀሩ በኋላ ልክ እንደ ኢህአፓው “ዘመን” ደግሞ የኪሣራቸው ምልክትና የግብዐተ መሬታቸው ወግ በሆነው ፀረሕዝብ አመፅ በአብዮቱ ሰፈር ላይ ተሠማሩ። በመኢሶን አባላት ላይ ብቻ ሳይሆን በጠቅላላው በዲሞክራቶችና በአገር ወዳጆች ላይ ይህ ነው የማይባል ግፍና በደል ፈፀሙ። ነገር ግን የመጀመሪያው ዙር ፀረሕዝብ አመፅ መኢሶንን ከሃቀኛ መሥመሩ ፈቅ እንዳላደረገው ሁሉ ይኸኛውም በንዑስ ከበርቴው ደርግ፣ በአድሃሪው ቢሮክራሲና በቀኝ አደርባይ ድርጅቶች አማካኝነት በአብዮት ሠፈር ላይ የወረደው የእሥራት፣ የግርፋትና የርሸና ዘመቻ ለአብዮትና ለኢትዮጵያ ክብር ብሎ ከተያያዘው ትግል እንዲያፈገፍግ አላደረገውም። ፀረ ሕዝቦችንም ከኪሣራና ከታሪክ ትቢያነት እንዳላዳናቸውና እነርሱም ልክ እንደ ኢህአፓ በሰፊው ሕዝብ ተተፍተውና የውርደት ማቅ ተከናንበው እንደከሰሙ በዚህ በያዝነው ዓመት የቀኝ አደርባይ ድርጅቶች ያጋጠማቸው ዕጣ አበጥሮ አሳይቶናል።

ዛሬ መኢሶን ሦስት ዓመት ሙሉ ከተለያዩ ፀረ ሕዝብ ኃይሎች በተለያዩ ጊዜያት እየተፈራረቀ የወረደበትን አመፅ አልፎ፣ ድርጅታዊ ህልውናውን ሳያስደፍር በመዝለቁ ለኢትዮጵያ ክብርና ለአብዮታችን የቆመ ሃቀኛ ኢትዮጵያውያን ሁሉ የሚኮሩበትና የሚመኩበት ድርጅት ነው። ዛሬ ይህ ድርጅታችን እየወደቀና እየተነሣ ሳያቋርጥ ወደፊት የተራመደበትን የአሥራ አንድ ዓመት የትግል ጉዞ ዘወር ብሎ ሲቃኝ ብዙ የታሪክ ገፆችን በታጋይ አባላቱ ደም የፃፈ መሆኑን እየተመለከተ በነዚህ ጓዶችና ጓዲቶች ፊት ተገቢ የሆነ ኩራት ይሰማዋል። ዛሬም በብዙ ሺ የሚቆጠሩ የመኢሶን አባላት፣ ደጋፊዎችና ወገኖች ሁሉ በደርግ አሥር ቤት ቢማቅቁም፣ አያሌ የመኢሶን ግንባር ቀደም ታጋይ ጓዶችና ጓዲቶች ቢወድቁም፣ ደርግና ፀረ ሕዝቦች ሲያልሙት ይኖራሉ እንጂ የነርሱ አርማ ከቶም አይወድቅም፤ አልወደቀምም። በሚሊዮን የሚቆጠረው የኢት ሰፊ ሕዝብ ያነሳው አርማ ነውና። በነዚህ ታጋይ አባላቱም ፊት ሆነ በጠቅላላው ለኢትዮጵያ ክብርና ነፃነት ሲከራከሩ በወደቁ ገበሬዎችና ወዛደሮች፣ መለዮ ለባሾችና ምሁራን፣ ወጣቶችና ሴቶች፣ ዲሞክራቶች አገር ወዳዶችና የጭቁን ብሄረሰቦች ታጋዮች ሁሉ ፊት “የነፃነቱ ትግል ይቀጥላል” እያለ መኢሶን የትግል ቃልኪዳኑን ያድሳል። ይህን ቃልኪዳን በማክበር መኢሶን የወደፊት ትግሉን የሚቀይሰው ከዛሬይቱ ኢትዮጵያ ሁኔታ ከሚፈልቁ አንዳንድ መሠረታዊ ሃቆች ተነስቶ ነው። እነርሱም የሚከተሉት ናቸው።

አንደኛ፣ ዛሬ መኢሶንም ሆነ በጠቅላላው ኢትዮጵያ ሕዝብ የቆመላቸውና ያ ሁሉ ደም የተገበረላቸው የዲሞክራሲ፣ የእኩልነትና የብሄራዊ ነፃነት ዓላማዎች ገና ግባቸውን አልመቱም። እርግጥ ከየካቲት 1966 ዓ.ም. ጀምሮ ተፋፍሞ በተካሄደው ትግል ብዙ ድሎች ተገኝተዋል። ነገር ግን ከሁለት ዓመት ወዲህ በኢትዮጵያ ምድር የሚታየው ሃቅ በአብዮታችን መመሪያ የተዘረዘሩት ዓላማዎች አንቀፅ በአንቀፅ እየተሻሩ የኋሊት ጉዞ መጀመሩ ነው። በዚህ ሂደት ከተቀጠለ ዛሬ በተግባር የተሻረው የኢትዮጵያ ብሄራዊ ዲሞክራሲያዊ አብዮት ፕሮግራም በፀረ አብዮት ኃይሎች በይፋ እንደሚሻር መጠራጠር አይቻልም። ስለሆነም ሰፊው የኢትዮጵያ ሕዝብ፣ በከፍተኛ ምስዋዕትነት ከተጎናፀፏቸው በኋላ የተነጠቁትን ድሎቹን መልሶ ለመጎናፀፍ እንደዚሁም አዲስ ድሎችን ተጎናፅፎ ወደ ሕዝባዊት ዲሞክራሲያዊት ኢትዮጵያ እንዲያመራ ትግሉን ማፋፋም አለበት። በዚህ ትግል ውስጥ መኢሶን ገና በፕሮግራሙ ውስጥ “የኢትዮጵያ ጭቁኖች የሚያደርጉት የተበታተነ ትግል ከዳር እስከዳር አስተባብሮ የተጣራ አብዮታዊ አመራር ለመስጠት በታሪክ ፊት የተቀበለውን አደራ እስከ መጨረሻው ይጠብቃል” ባለው መሠረትና ከዚያም ወዲህ እያደጋገመ ባደሰው ቃልኪዳን መሠረት በኢትዮጵያ ብሄራዊና ዲሞክራሲያዊ አብዮት ፕሮግራም ባንዲራ ሥር ትግሉን ይቀጥላል።

ሁለተኛ፣ ምንም እንኳን ዛሬ በኢትዮጵያ ፀረአብዮት አይሎ የብሄራዊ ክብራችን ፀር የሆኑ ኃይሎች በሃገራችን አንሠራፍተው፣ በሰፊው ሕዝብና በወገኖቹ ላይ ከፍተኛ የሆነ ፀረ ሕዝብ አመፅ ቢወርድም መኢሶን፣ በአጠቃላይ ወቅቱ ለኢትዮጵያ ክብርና ነፃነት ለሚታገሉ ኃይሎች ያመቸ ነው ብሎ ያምናል። ዛሬ የኢትዮጵያ ሕዝብ እስኪያንገፈግፈው ድረስ ከመረረው ሥርዓት በትግሉ ተላቆ አዲሲቱን ዲሞክራሲያዊት ኢትዮጵያ መመልከት የጀመረበት ወቅት ነው። መልኩን የቀየረ ሌላ ፀረ ሕዝብ ፈላጭ ቆራጭነት፣ መልኩን የቀየረ ሌላ ብሄራዊ ውርደትና የአፍሪካ ሃፍረትነት በምንም ዓይነት አይሻም። ከዚህ በተጨማሪ በመጀመሪያ ጊዜ በታሪኩ ከዳር እስከዳር የሚያውቀው፣ የተቀበለውና የተሰዋለት ሳይንሣዊ የሆነ መመሪያ አለው። ስለሆነም በዚህ ሳይንሣዊ ፕሮግራም እየተመራ ለመጓዝ እስከፈለገ ድረስ በሱ የአብዮት ፍላጎት አንፃር የፀረአብዮት ኃይሎች ማየል ዘላቂነት የለውም፣ በሱ የሃገር ፍቅር ስሜትና ወኔ አንፃር የጥቂት የታሪክ ጉድፎች ማየልም ዘላቂነት አይኖረውም። ስለሆነም መኢሶን የኢትዮጵያን ማርክሲስት ሌኒኒስቶች ዲሞክራቶችና አገር ወዳዶች ሁሉ ይህንን መሠረታዊ ሃቅ ተገንዝበው ተስፋ መቁረጥንና ውዥንብርን እየተዋጉ የነፃነቱን በአንድነት በግንባር ቀደምነት እንዲያፋፍሙ አብዮታዊና ብሄራዊ ጥሪ ያቀርብላቸዋል።

ሦስተኛ በዚህ ትግል ዘመን መጭው ጊዜ ለአብዮትና ለኢትዮጵያ ክብር ለሚታገሉ ማርክሲስቶች፣ ዲሞክራቶችና አገር ወዳዶች ሁሉ ይበልጥ እያመቸ እንደሚሄድም መኢሶን አይጠራጠርም። ይህንን ሃቅ አለመቀበል የኢትዮጵያን አብዮት አንገብጋቢ ጥያቄዎች የሕዝቡን የዲሞክራሲ መብቶች ጥያቄም ሆነ የብሄረሰቦችን የእኩልነት ጥያቄ፣ የብሄራዊ ነፃነታችንንም ሆነ ሌሎችን የሰፊው ሕዝብ ጥያቄዎች ታሪክ ያለፈው የቀኝ ኃይሎች ህብረት በሚገባ ይመስላቸዋል እንደማለት ይቆጠራል። ወይም ደግሞ የኢትዮጵያ ጭቁኖች ዲሞክራሲን ከቀመሱ በኋላ ወደ አዲስ ፀረሕዝብ ፈላጭ ቆራጭ አገዛዝ፣ የአሜሪካን ኢምፔሪያሊዝምን እያደከሙ ብሄራዊ ነፃነታቸውን መልሰው መጎናፀፍ ከጀመሩ በኋላ ወደ ሌላ አይነት ብሄራዊ ውርደት ሲነጉዱ አይናቸው እያየ ዝም ይላሉ እንደማለት ይቆጠራል። ሁለቱም የአድሃሪያን የቁም ቅዥቶች ናቸው። ከሃገሪቱ ተጨባጭ ሁኔታም ከሕዝቦቿም የሃገር ፍቅር ተጋድሎ ታሪክ ጋር የሚጣጣሙ አይደሉም። እንደዚህም በመሆኑ የቀኝ ኃይሎች ሕብረት ከዕለት ዕለት በክህደት ቁልቁለት እየተሽቆለቆለ፣ ከዕለት ዕለት ይበልጡን ከሰፊ የኢትዮጵያ ሕዝብ ህልምና ፍላጎት እየራቀ፣ በዚህም የተነሳ ከዕለት ዕለት በሕዝቡ እየተፋፋመ ተቃውሞም እየቀሰቀሰ እንደሚሄድ ሳይታለም የተፈታ ጉዳይ ነው። በዚህ ልክ ደግሞ ክህደትን አሻፈረን ብለው በሰፊው ሕዝብ ወገን የፀኑ ማርክሲስት ሌኒኒስቶች፣ ዲሞክራቶችና አገር ወዳጆች ሁሉ ምንም ያህል መስዋዕትነት ቢጠይቃቸውም መጭውን የመራራ ትግልና የመስዋዕትነት ብሎም የመጨረሻ ድል ዘመን የሚያያዙት በማይቀረው አሸናፊነታቸውና በዘላቂው ኃያልነታቸው ያላችውን ፅኑ ዕምነት አድሰው ነው ማለት ነው።

አራተኛ ከነዚህ ሃቆች በመነሣት ዛሬ የተመሠረተበት 11ኛ ዓመት በሚያከብርበት ወቅት መኢሶን ለኢትዮጵያ ማርክሲስቶች፣ ዲሞክራቶችና አገር ወዳጆች፣ ያ ሁሉ ደም የተለገሠለት አብዮታችን መቀልበስ፣ የተደነቀው የብሄራዊ ነፃነታችን ታሪክ መጉደፍ ላንገበገባቸው ኢትዮጵያውያን/ት/ ሁሉ በሰፊው ሕዝብ ድምፅ ቁ.69 ያቀረበውን ጥሪ ያድስላቸዋል። የኢትዮጵያ አብዮት ከግቡ መድረስም ሆነ የብሄራዊ ነፃነቷን መክበር የመሰለ ቁም ነገር የኔ ብቻ ታሪካዊ አደራ ነው ብሎ የተመፃደቀበት ወቅት በመኢሶን የትግል ታሪክ ውስጥ አይገኝም። የመኢሶን ዓላማ እርሱ ለቆመለት የአብዮትና የብሄራዊ ነፃነት ዓላማ የቆመ ሁሉ ተባብረው በሁላችንም ትግል የሁላችንም የሆነች ሕዝባዊት ዲሞክራሲያዊት ኢትዮጵያ ለመመሠረት በሚደረገው ትግል የበኩሉን አስተዋፅኦ ለማድረግ ነው። ስለሆነም ይህ የጉዞ አንድነት ካምናው ይልቅ ዘንድሮ በይበልጥ በሥራ እንዲተረጎም፣ የኢትዮጵያ ገበሬዎች ወዛደሮች፣ መለዮ ለበሾችና ምሁራን፣ ወጣቶችና ሴቶች፣ አገር ወዳድ የጦርና የፖሊስ መኮንኖች/ በደርጉ ውስጥ የቀሩት ጭምር/ ዲሞክራቶችና የጭቁን ብሄረሰብ ታጋዮች ሁሉ ጥቃቅን ልዩነታቸውን አቻችለው በዋናው ቁም ነገር ማለትም የኢትዮጵያ አብዮትና ብሄራዊ ነፃነት ጉዳይ ላይ እንዲሰበሰቡ፣ ሌሎች ታጋዮች ቀደም ሲል ያወቁለትን የኢትዮጵያ ብሄራዊ ዲሞክራሲያዊ አብዮት ፕሮግራም አርማ ይዘው በህብረት ወደፊት እዲጓዙ አብዮታዊና ብሄራዊ ጥሪውን ያስተላልፍላቸዋል።