በዚህ ጋዜጣ አርእስት ውስጥ እንደተመለከተው የኢትዮጵያ ሰፊ ሕዝብ የሠራተኛውን፣ የጭሰኛ፣ ድሃ ገበሬውንና የንጉስ ከበርቴውን መደቦች ያጠቃልላል። ይኽውም ሲዘረዘር፡-

1. ሠራተኛ፡- በፋብሪካ፣ በዘመናዊ እርሻ፣ በንግድ፣ በሕንፃ፣ በመንገድና ተመሳሳይ ኢኮኖሚ ነክ ድርጅቶች ውስጥ በመቀጠር የጉልበቱንና የአእምሮውን ኃይል እየሸጠ የሚኖረው ወዛደር መደብ ነው።
2. ጭሰኛና ድሃ ገበሬ፡- ይህ ክፍል ፍጹም መሬት የሌላቸውን /60-70 በመቶ/ እርቦ፣ ሲሶ፣ እኩል አፍሳሾችና፤ ሊያኖራቸው የሚችል በቂ የሚያርሱት መሬት የሌላቸውን /20-30 በመቶ/ ሞፈር ዘማቾች ወይም ከፊል ጭሰኞችን ያጠቃልላል። ይህ ክፍል ከጠቅላላው ሕዝብ 90 በመቶ በላይ ይይዛል።
3. ንዑስ ከበርቴ፡- ይህ መደብ በውስጡ ልዩ ክፍሎች አሉት። መካከለኛና ዝቅተኛ የመንግሥት ሠራተኞች ዝቅተኛ ነጋዴዎችንና ባለእጅጥበቦች፣ መምህራን፣ ምሁራን፣ ተማሪዎች፣ መካከለኛና ዝቅተኛ ወታደራዊ መኮንኖችና ወታደሮች ሌሎችም ቋሚና ኢኮኖሚ ነክ ባልሆኑ ልዩ ልዩ የዕለት ተግባራት በመሰማራት ከእጅ ወደ አፍ በሆነ የኑሮ ዘዴ የሚውተረተሩትን ሁሉ በዚህ መደቦች ለማጠቃለል ይቻላል።

የኢትዮጵያ ሰፊ ሕዝብ የምንላቸው እነዚህን ሲሆን ወታደሩም የዚህ የሰፊው ሕዝብ አካል መሆኑ ግልጽ ነው። ወታደር ወንድሙ ወይም አባቱ ከሆነው ጭሰኛና ድሃ ገበሬ፡ ሠራተኛና ነጋዴ ልጁ ወይም ወንድሙ ከሆነው ተማሪ የሚለየው የተለየ ዩኒፎርም በመልበሱና የጦር መሳሪያ በመያዙ ነው። ዋናው ልዩነት ይኽ ሲሆን ይኸውም ለተወሰነ ጊዜ ብቻ ነው። በቀን ከሰባት ወይም ከስምንት ሰዓት በስተቀር የሚኖረው ያው ከቤተሰቡ፣ ከጎረቤቱ፣ ከቀበሌው ሰፊ ሕዝብ ጋር ነው። ጥቅሙም፣ ጉዳቱም፣ ሐዘኑም፣ ደስታውም ከሰፊው ሕዝብ አይለይም፤ ቁራጩ ፍላጩ ነውና። ይህን ግልጽ ነገር ለማመልከት የተገደድንበት ዋናው ምክንያት፣ ወታደሩ የሰፊው ሕዝብ አካል እንዳልሆነ፣ በመካከላቸው መሰረታዊ የጥቅም ቅራኔ እንዳለ፣ ወታደሩ ሰፊውን ሕዝብ ማመን እንደሌለበት ወዘተ…. አስመስለው በማቅረብ ለማወናበድ የሚፈልጉ አንዳንድ የሃሳብ ጨቅላዎች የሰፊውን ሕዝብ ድል ለማጨናገፍና ለግል ጥቅማቸው ለማዋል በመነሳታቸው ነው። ወታደር በሰፊው ሕዝብ ውቅያኖስ ውስጥ የሚኖር ዓሳ ማለት ነው።

የኢትዮጵያ ሰፊ ሕዝብ ለአያሌ ዘመናት በነገሥታት፣ በመሳፍንት፣ በባላባቶችና በመኳንንት ሲጨቆንና ሲበዘበዝ የኖረ መሆኑ የሚያከራከር አይደለም። እስካሁን የነበረው የኢትዮጵያ ታሪክ የዚሁ የጭቆናና የብዝበዛ ታሪክ ነው። ባለፈው የካቲት የፈነዳው የትግል እሳተጎሞራ የዚህ ከመጠን ያለፈ ጭቆናና ብዝበዛ ውጤት እንደሆነ ለማንም ግልጽ ነው።

የኢትዮጵያ ሰፊ ሕዝብ ብዝበዛውና ምዝበራው በዛብኝ፣ የጭቆናውን ቀንበር ለመሸከም አልቻልኩም፣ በቃኝ አንገፍግፎኛል በማለት የገዢውን መደብ የመጨቆኛና የመደምሰሻ መሳሪያዎች ተቋቋመ፣ ባንድነት ተነሳ። ምንም እንኳን በመሳርያነት ሲያገለግል ቢኖርም ወታደሩም የተጨቆነና ግፍ የተዋለበት በመሆኑ አፈሙዙን በገዥው ክፍል ላይ አዞረ፤ ከሰፊው ሕዝብ ጎን ተሰለፈ። ሰፊው ሕዝብ መሰረታዊ፣ ሰብአዊና ብሔራዊ መብቱን ከመነጠቁ የተነሳ ወደ ዲሞክራሲ የሚመራው የራሱ የሆኑ የፖለቲካ ድርጅት በማጣቱ ለጊዜው መሳሪያ ይዞና ተደራጅቶ የተገኘው ወታደር የፖለቲካ ስልጣንን ያዘ።

ታዲያ ሰፊው ሕዝብ ብኩርናውን ሸጠ ማለት ነው? አጠቃላይ የፖለቲካ ድርጅት ባይኖረውስ ሌሎች ድርጅቶች ፈፅሞ የሉትም ማለት ይቻላል? የኢትዮጵያ ሠራተኞች አንድነት ማህበር፡ የኢትዮጵያ መምህራን ማህበር፣ የተማሪዎች ማሕበር፣ በየቦታው በመቋቋምና በመስፋፋት ላይ ያሉት ልዩ ልዩ የገበሬዎች ማህበራት፣ የህብረት ሥራ ድርጅቶች፣ ዕድሮች፣ የመረዳጃና የልማት ማህበሮች ወዘተ… በመጠኑም ቢሆን አሉት። በእነዚህ አማካይነት መብቱንና ጥቅሙን ለማስከበርና ለማስጠበቅ አይችልም ወይ? ከነዚህ የተወጣጡ ወኪሎች ከወታደሩ ከተወከሉ አባሎች ጋር ሆነው ጊዜያዊ የሕዝብ መንግሥት ለማቋቋም የማይችሉበት ምን በቂ ምክንያት አለ? ሰብአዊና ብሔራዊ መብቶቹና ነፃነቶቹ ባይታገዱበት በተለይ የንግግር፣ የጋዜጣ፣ የማህበር፣ የመሰብሰብ፣ መብቶች ሥራ ላይ ቢውሉና ሕዝቡ ባይታፈን እስካሁን ድረስ ሰፊውን ሕዝብ የሚወክሉ የፖለቲካ ማህበሮች /ፓርቲዎች/ ሊቋቋሙ የማይችሉበት ምን ምክንያት ይኖር ይሆን? አሁንስ ቢሆን ይህን ለማድረግ ምን የሚያስቸግር ነገር አለ?

ሰፊው የኢትዮጵያ ሕዝብ የባላባታዊውን ሥርዓትና የኢምፔሪያሊዝምን ብዝበዛና ጭቆና ለማስወገድ ታሪካዊ የትግል እንቅስቃሴ በይፋ ሲጀምር ግልጥና ተጨባጭ ጥያቄዎች ነበሩት። ከጠቅላላው ሕዝብ 90 በመቶ ገደማ የሚሆነው ጭሰኛና ደሃ ገበሬ የጠየቀው ‘መሬት ላራሹ’ የሚለውን መሪ ቃል በመከተል ራሱንና ቤተሰቡን ሊያስተዳደርበት የሚያስችለው በቂ የሚያርሰው መሬት እንዲያገኝ፣ ለባለ መሬት እርቦ፣ ሲሶ፣ እኩል ማፍሰሱ፤ እህል፣ አሻሮ፣ ብቅል፣ ማስፈጨቱና መጫኑ፤ ጌሾ መውቀጡ፣ የዓመት በዓል ሙክት መጎተቱ፣ በሆነ ባልሆነው ጉቦ መስጠቱ፣ እርሻ አርሞ፣ ውቂያ፣ ወዘተ… እየተባለ በብላሽ፣ በነፃ መሥራቱ እንዲቀርለት፣ ይህ ሁሉ ብዝበዛ እንዲወገድ የመንግሥት ባለስልጣኖች፣ ጭቃ ሹም መልከኛ፣ ባላባት፣ ዳኛ፣ ወረዳ ገዢ፣ አውራጃ ገዥ፣ እንደራሴ፣ ዳኛ፣ በጅሮንድ ጸሐፊዎች፣ ፖሊሶች፣ መታያ፣ መማለጃ፣ የዓመትበዓል፣ የአክፋይ፣ የጠረጴዛ ወዘተ…እጅ በለን በማለት መበዝበዛቸው፣ ማሰራቸው፣ መጨቆናቸው ወዘተ… እንዲቀር፣ የጤና፣ የትምህርት፣ ግብር፣ የልማት፣ የወህኒ ቤት፣ የፖሊስ ጣቢያ፣ የቤተክርስቲያን፣ የመንገድ ወዘተ…መዋጮ የጥቅም ወይም የገቢ ግብር እየተባለ በመገደድ የሚከፍለው የባለስልጣኖችን ቦርጭ ማሳበጫ መሆኑ ቀርቶ በቂ የትምህርት፣ የጤና፣ የገበያ፣ የአስተዳደር አገልግሎቶች እንዲሰጡት፣ መንገድ እንዲሰራለት፣ ለጤና ተስማሚ የሆነ ውኃና የኤሌክትሪክ መብራት እንዲያገኝ፣ ሰብአዊና ብሔራዊ መብቶቹና ነፃነቶቹ እንዲከበሩ፣ በብሔር፣ በነገድ፣ በጎሳ፣ በሃይማኖት፣ በቋንቋ፣ በጾታ በመሳሰለው ሁሉ ልዩነት መደረጉ ቀርቶ ፍጹም እኩልነት እንዲኖር ነው።

ሠራተኛው የጠየቀው ከኑሮ ሁኔታ ጋር የተመጣጠነ የሥራ ዋጋ እንዲከፈለው፣ አሠሪው የላቡን ዋጋ እንዳይዘርፈው፣ እንደፈለገውና እንደሰባራ ገል አውጥቶ እንዳይጥለው፣ ትምህርት እንዲሰጠው፣ ጤናው እንዲጠበቅለት ነው። የሥራአጡም ሰራዊት የጠየቀው ሥራ እንዲሰጠው ነው። ተማሪውም የጠየቀው ትምህርት ለሁሉም እንዲዳረስና የሰፊው ሕዝብ መብቶችና ነፃነቶች እንዲከበሩና እንዲጠበቁ፣ ጨቋኙና በዝባዡ ሥርዓት በሕዝባዊ ሥርዓት እንዲተካ ነው። ዝቅተኛው ነጋዴና ባለእጁም የጠይቀው የውጭ ካፒታሊስቶች ገበያውን በሞኖፖል እንዳይዙበት፣ እንዳያቆረቁዙት ከመንግሥት ድጋፍና እርዳታ እንዲደረግለት ነው። በወታደሩም በኩል ቢሆን የጠየቀው ደመወዝና አበል ከኑሮ ዋጋ ጋር እንዲስተካከል፣ ለመኮንኖች እንደባርያ እንደግል አሽከር ማገልገላቸው እንዲቀር ወዘተ…የሚል ሲሆን በሁሉም ዘንድ ሰብአዊና ብሔራዊ መብቶችና ነፃነቶች እንዲከበሩ፣ እነዚህንም ሊያስፈጽምና ሥራ ላይ ሊያውል የሚችል ዲሞክራሲያዊ የሕዝብ መንግሥት በፍጥነት እንዲቋቋም ነው። የጊዜው ዋና ዋና ጥያቄዎች እነዚህ ነበሩ፤ አሁንም ናቸው።

እነዚህ ሁሉ ጥያቄዎች ሊሟሉ የሚችሉት ባላባታዊ ሥርዓት ተደምስሶ ከኢምፔሪያሊስት ተጽዕኖ ነጻ የሆነ ዲሞክራሲያዊ ሪፐብሊክ ሲመሠረት ብቻ ነው። የኢትዮጵያ ሰፊ ሕዝብ የጥቂት ምርጦች ፈላጭ ቆራጭነትን አይፈልግም፣ የአንድ ነጋሲ አምባገነንነትን በጥቂት ‘ምርጦች’ አምባገነንነት ለመለወጥ ከቶ ፍላጎት የለውም። ፈላጭ ቆራጮችን፣ አምባገነኖችን የተሸከሙበት ትከሻው ተልጧል፣ ጀርባው ተገጣጥቧል። ፈላጭ ቆራጩን አምባገነን መሸከሙ አንገፍግፎታል። ሞግዚት እንሁንህ፣ እናዘጋጅህ ወዘተ… በማለት ከተመላለጠው ጫንቃው ላይ ፊጥ በማለት አዛኝ ቅቤ አንጓቾችን አጥብቆ ይቃወማቸዋል።

‘….. ኢትዮጵያ የተለየች አገር ናት፣ ሕዝቦቿም ልዩ ናቸው፣ ታሪካችን /የፈረደበት የ3ሺ አመት ታሪክ/ ከዓለም ሕዝቦች ታሪክ በምንም አይገናኝም…. የቀሩትን የዓለም ሕዝቦች የመፈንቅለ መንግሥት /ኩዴታ/ ትምህርት በማስተማር ላይ ነን፤ ዓለም አብነታችንን በአድናቆት መከተል ይኖርበታል፤ ወዘተ…’ በማለት ለሚቀባዥሩትን የስልጣን ጥም ለያዛቸው እፍኝ ለማይሞሉ ‘ምርጦች’ ልናስጠነቀቃቸው ይገባናል። አንዳንድ የሦስተኛውን ዓለም በተለይም የአፍሪካን ሃገሮች ምሳሌ ብንጠቅስ፣ ታንዛንያ ባንድ የፖለቲካ ማህበር በሚመራ መንግሥት ትተዳደራለች፤ ሶማሊያ፣ ናይጄሪያ፣ አልጄሪያ፣ ጋና፣ ወዘተ….የወታደር መንግሥት አላቸው፣ ደህና በመሥራት ላይ ናቸው፣ ሕዝቡ ተቀብሏቸዋል ወዘተ…የሚሉት ጥራዝ ነጠቅነት መክፈልት ሲሹ መቅሰፍት እንዳይኾን ጉዳዩን ጠለቅ ብለው ቢያዩት ይሻላቸዋል።

እነዚህ ሃገሮች ከኢትዮጵያ የሚላዩበት አንድ ዋና ነገር አለ። ይኸውም ለተወሰነ ጊዜ ዲሞክራሲ መኖሩ ነው። የፖለቲካ ፓርቲዎችም በነዚህ ሃገር ታሪክ ውስጥ ታይቷል። በርከት ያሉ የፖለቲካ ማህበሮች ተቋቁመዋል። ሰፊው ሕዝብ ሰብአዊና ብሔራዊ መብቶች፤ አነሰም በዛ ተከብረውለታል። ከላይ በተጠቀሱት አገሮች ውስጥ በየጊዜው የተለያዩ የፖለቲካ እንቅስቃሴዎች መደረጋቸውና ሕዝብም ከእነዚሁ እንቅስቃሴዎች ብዙ ትምህርት መቅሰሙ የማይካድ ነው። ከነዚህ ሃገሮች በብዙዎቹ ውስጥም ወታደራዊ መንግሥት የተቋቋመው ሰፊው ሕዝብ ሳይፈልግ በግድ ነው፤ የፖለቲካ ፓርቲዎችም ቢሆኑ የሰፊው ሕዝብ ፍላጎት የማያሟሉ፣ ቅራኔ የበዛባቸው የሕዝቡን ችግሮች ለመፍታት ያልቻሉ ናቸው። ስለዚህ የነርሱን ምሳሌ ለመከተል መሞከር አለማወቅን ማሳየት ይሆናል።

‘ምርጦቹና’ አጫፋሪዎቻቸው ‘ሊቃውንት’፣ እንደዚሁም የስልጣን ፍርፋሪ ለመለቃቀም ያሰፈሰፉት ቲፎዞዎቻቸው ይህን ሀቅና እውነት አያዩም፣ በሞኖፖል በያዙዋቸው የሕዝብ ዜና ማሰራጫዎች ትክክለኛውንና የሚያዋጠውን መንገድ፤ የሰፊውን ሕዝብ እውነተኛ ፍላጎት ለማመልከት የሚቃጡትን የኢትዮጵያን የሕዝብ ወገኖች ለማጥላላትና ለማርከስ ትልቅ የማወናበድ ዘመቻ ይዘዋል። በልዩ ልዩ ተንኮልና ሴራ የዋሁን ሠራዊት በመሸንገል ለሕዝቡ ታሪካዊ ትግል እንቅፋት ሆነዋል። እውነት ብትመነምን አትሞትም የሚለውን ምሳሌ ገና ካሁኑ በመዘንጋት በተራማጅ የሕዝብ ወገኖች ላይ የውሸት ተራራ በመጫን ላይ ናቸው። የታሰሩት ባለስልጣኖች ልጆችና ወገኖች ናቸው። የውጭ መሣሪያ ናቸው፤ ሥራ የማይሰሩ ሰነፎች ናቸው ወዘተ… በማለት ለብዙ ዓመታት ትልቅ መስዋዕትነት የተቀበሉ ለሰፊው ሕዝብ መብትና ጥቅም ሲታገሉ የቆዩትን የሕዝብ ወገኖች ለማሳጣትና ከሕዝቡ ጋር ለማቃቃር በመጣር ላይ ናቸው። ይኸው ተንኮላቸው መልሶ እንደሚያጠቃቸው አንድና ሁለት የለውም። ይህንንስ ትናንት የሰው ጣኦት ከነበረውና ዛሬ ምስኪን እስረኛ ከሆነው ኃይለሥላሴ እንዴት ሊረዱት አይችሉም? ይህ ደደብነት ነው ወይስ አወናባጅነት?

የኢትዮጵያ ሰፊ ሕዝብ ጥያቄዎችና ፍላጎቶችን ችላ ብለው በማለፍ ‘ምርጦቹ’ አወናባጆች የሰፊውን ሕዝብ ትርታ ተከትለን ነው የምንሄደው፣ ኃይለሥላሴንና ፍጡሮቹን ይዘን አስረንላችኋል፣ ለፍርድ እናቀርባቸዋለን፣ ሀሁ አስቆጥረን፣ ሕዝቡን አስተምረንና አዘጋጅተን የሕዝብ መንግሥት እናቋቁምለታለን፣ እኛኮ የኢትዮጵያ ድሆች ልጆች ነን የጎመን ጨማቂ ልጆች ነን፣ ወዘተ…በማለት ሰፊው ሕዝብ ሳይጠራጠር እጁን ዘርግቶ፣ ቀይ ስጋጃ አንጥፎ እንዲቀበላቸው ይፋዋጭራሉ። እውነቱ ግን ሌላ ነው።

‘ከምርጦቹ’ ውስጥ የጎመን ጭማቂ ልጅ ማን ነው? የጭሰኛና የድሃ ገበሬ ልጆችስ እነማን ናቸው? አማን አንዶም፣ በላቸው ጀማነህ፣ ብርሃኑ ባየህ፣ ወይስ እነሲሳይና ሌሎቹ ናቸው? ይህ ፍጹም ማወናበድ ነው። ሰውን የሕዝቡ ወገን የሚያደርገው ከድሃ መወለዱ ሳይሆን የሰፊውን ሕዝብ ፍላጎት ተረድቶ ከሰፊው ሕዝብ ጎን ለትግል መሰለፉ ነው። ታዲያ ለዚሁስ ቢሆን ምን ማጭበርበር ያሻዋል?

ከብዙ ጊዜ ማጥፋትና ማመንታት በኋላ አጤ ኃይለሥለሴ ከስልጣን ወርደዋል፣ መሳፍንቱና መኳንንቱ /ከሁለት መቶ የማይበልጡ/ ተይዘው 4ኛ ክፍለጦር ገብተዋል። ለምን እስካሁን ድረስ ለፍርድ አልቀረቡም? ለምንስ አልተቀጡም? ደግሞስ ሕዝቡን ሲጨቁኑትና ሲበዘብዙት የኖሩት እነዚህ ብቻ ናቸው? የኃይለሥላሴ መሳሪያ በመሆን ስንቱን አገርወዳድ በግፍ ሲቀጠቅጡ፣ ሲወግሩ፣ ሲያሰቃዩ፣ በሰው ሕይወት ሲያላግጡ፣ ሲጫወቱ የቆዩት እነኮለኔል በላቸው ጀማነህ አሁን ምን በመሥራት ላይ ናቸው? ፊትስ እነኃይለሥላሴን በጠቅላላውም በዝባዦችንና ጨቋኞችን ማን ነበር የሚጠብቃቸው? እነዚሁ አልነበሩምን? አለበለዚያማ ሰፊው ሕዝብ ድራሻቸውን ያጠፋው ነበር።

‘ምርጦቹ’ ጠንካራ መንግሥት የሚያስፈልገው መሳፍንትንና ባለስልጣኖችን ለመቅጣት፤ ሥርዓቱንም ለመለወጥ ነው ይላሉ፣ አሁን ዲሞክራሲ የተሰጠ እንደሆን እነዚያ ጨቋኞችና በዝባዦች ተመልሰው ይመጣሉ፣ ሕዝቡ ጫንቃ ላይ እንደገና ይቀመጣሉ እያሉ ያስፈራሩናል። ሕዝቡን ሞኝ ተላላ፣ ጥቅሙንና ጉዳቱን፣ ወዳጁንና ጠላቱን ለይቶ የማያውቅ ቂል አድርገው ይመለከቱታል። ይህ ሁሉ ሆድ ሲያውቅ ዶሮ ማታ ነው፣ ‘ምርጦቹ’ የሰፊውን ሕዝብ ጩኸት መቀማታቸው ነው። ‘የራሷ ሲያረባት የሰው ታማስላለች’ እንደሚባለው ነው።

‘ምርጦቹ’ አልፈው አልፈው አንዳንድ ነጠላ ድርጊቶችን በመፈጸም አላማችንን በግብር አሳይተናል እያሉ ይደነፋሉ። አላማ ብለው ያወጡት የተድበሰበሰ ነው። ራበኝ፣ ጠማኝ፣ ታረዝኩ፣ በሽታ ጨረሰኝ ለሚለው ሕዝብ ባህል፣ ታሪክ፣ ቅርስ ወዘተ…. እያሉ ማታከትና ማጭበርበር ምን ፋይዳ አለው? ስልጣን ኮርቻ ላይ ብዙ ዘመን ለመቆየት ሲባል ትግሉ ገና ነው፣ ምን ተይዞ ጉዞ፣ እኛ ዞር ያልን እንደሆን ጉድ ይፈላባቸኋል፣ እስክናሰለጥናችሁ፣ እስክናስተምራችሁ፣ ራሳችሁን በራሳችሁ ለማስተዳደር እስክትበቁና ሕዝባዊ መንግሥት እስኪቋቋም ድረስ መጠበቅ አለባችሁ፣ ጨዋ ሁኑ፣ ታገሡ፣ መብት፣ መብት፣ ዲሞክራሲ፣ ዲሞክራሲ የሚሉትን ተጠንቀቁ በማለት እየደለሉና እያስፈራሩ ሰፊውን ሕዝብ እንደፈረስ ሊጋልቡት ይፈልጋሉ።

የሕዝብ ንብረት የሆነውን ራድዮ፣ ጋዜጣና ቴሌቪዥን ጥርቅም አድርገው ይዘው ተራማጅ የሕዝብ ወገኖችን ያራክሱበታል፣ ያጥላሉበታል፣ ሕዝቡን ያወናብዱበታል፣ ያጭበረብሩበታል። ‘አልኩባዮች’ በሚል ርዕስ በእነዚሁ መሣሪያዎች ያሰራጩት ርካሽና የውሸት ዝባዝንኬ የ‘ምርጦቹን’ ምንነት ደህና አድርጎ የሚያሳይ ነው። ብልህን ማሞኘት ቂምን ማቆየት መሆኑን ማን በነገራቸው? እኛ ከሰፊው ሕዝብ ጎን የተሰለፍነው አወናባጆቹ እንደሚሉት ዝናና ታሪክ ፍለጋ አይደለም፣ የሰፊው ሕዝብ ፍላጎት እውነተኛና ትክክለኛ መሆኑን አጥብቀን የምናምን፣ከሕዝብ የወጣን የሕዝብ ወገኖች ነን። ታሪክ በቆራጥነትና በሥራ ክንውን እንጂ በምኞትና በፍላጎት የሚመጣ እንዳልሆነ አጥርተን እናውቃለን። በነገራችን ላይ ማናቸውም የኢትዮጵያ ዜጋ እኩል ነው ስንል፣ የሰፊው ሕዝብ መብቱ ይከበር፣ ፍላጎቱ ይሟላ ስንል ይህንኑ ለማስገኘት መታገልና አስፈላጊውንም መስዋዕትነት ለመቀበል ተዘጋጅተን እንጂ የአገርና የወገንን ጉዳይ ለጥቂት ‘ምርጥ መኮንኖች’ በመተው በአፍ ለማወናበድ አይደለም። እንደ ‘ምርጦቹ’ ለማወናበድ ሳይሆን በሃቅ የሰፊው ሕዝብ መብት፡ ጥቅምና ደህንነት መጠበቅ እንዳለበት እናምናለን፣ የትግሉ ባለቤት ሰፊው ሕዝብ እንደመሆኑ መጠን የርሱን ድል ማንም በማወናበድ እንዲቀማውና እንዲያበላሽበት አንፈልግም። ከሰፊው ሕዝብና ከወታደሩ በምርጫ የተውጣጣ ጊዜያዊ ሕዝባዊ መንግሥት በፍጥነት ይቋቋም፣ በአጭር ጊዜ ውስጥ ዲሞክራሲያዊ ህገ መንግሥት ወጥቶ ደንበኛ የሕዝብ መንግሥት የሚቋቋምበት ዝግጅት ይደረግ፣ እስከዚያው ድረስ አጣዳፊ የሆኑት የመሬት ላራሹ ጉዳይ፣ የድርቁ ጉዳይ፣ ሥራ ላጣውና ከሥራ ለተባረረው ሥራ የማግኘቱ ጉዳይ፣ ለሠራተኛውም ተገቢውን የጉልበቱን ዋጋ የመክፈሉን ጉዳይ፣ ከሥራው ላይ ላለመባረር ዋስትና የማግኘቱን ጉዳይ አጥብቀን እንመልከተው፤ መፍትሄም በቶሎ ይፈለግለት ነው ያልነው። ታዲያ እነዚህ ሀሳቦች ስለቀረቡ ይህን ያህል የሚደነፉ ሰዎች በተራማጁ ክፍል ላይ ይህን ያህል ዘመቻ የሚያደርጉ ሰዎች ምን ይረቡናል? ምናቸውስ ይታመናል? የዚህ ክፍለ ሃገር፣ አውራጃ፣ ወረዳ ወዘተ …ሕዝብ ደግፎናል፤ ተቀብሎናል እያሉ በሞኖፖል በያዟቸው የዜና ማሰራጫዎች እስከመቼ ሊያወናብዱ ይችላሉ?

ትግሉ በደርጉ ውስጥም ሆነ ውጭ በመፋፋም ላይ ነው። በ‘ምርጦቹ’ ቡድንና በአብዛኛው የደርጉ አባላት መካከል በየግዜው የሚፈጠረው አለመግባባትና እነዚሁ አወናባጆች በተቀሩት የሕዝቡ ወገን በሆኑ ወታደሮች ላይ በማከታተል የወሰዱት እርምጃ፤ በተለይም የመሀንዲስ ጦርና የአርሚ አቪየሽን መወረር በቀላሉ የሚታለፍ ድርጊት አይደለም። በወታደሩ ውስጥና በጠቅላላውም ሕዝብ ዘንድ ሕዝባዊ ስሜት ያላቸውን እውነተኛ አገር ወዳድ ኢትዮጵያውያን ለማዳከምና ለማጥፋት የሚያደርጉት ዘመቻ እነዚህን አወናባጆች እንደሚያጋልጣቸው አይጠረጠርም። አማን በየመስሪያ ቤቱ እየዞረ ስለደሰኮረ፣ የሕዝብ ፍቅር፣ የአገር ፍቅር ያንገበገባቸው ወታደሮችና ሲቪሎች ስለታሰሩና ስለተገደሉ፣ ሰብአዊና ብሔራዊ መብቶች ስለታፈኑ የሰፊው ሕዝብ ትግል አይቆምም፣ ይቀጥላል እንጂ። የሲአይኤ ልኡካን እነ ኮሪና እነ ዲምፖል ከምርጦቹ ጋር በመሆን የሰፊውን ሕዝብ ትግል ለማጨናገፍ ቢዶልቱም ቅሉ ሰፊው ሕዝብ ውሎ አድሮ ድልን መቀዳጀቱ አይቀርም። የሚያሳዝነው ዛሬ ለሰፊው ሕዝብ የሚጠቅሙ ብዙ ነገሮች ሊሰሩ ሲችሉ ባንዳንድ አወናባጆች ምክንያት እንደገና በቀጠሮ መተላለፋቸው ነው።

ኢትዮጵያ ዛሬ ብዙ ታጋይ ልጆች አሏት፣ ወደፊትም በብዙ ሚሊዮን የሚቆጠሩ የአገር ፍቅር ያንገበገባቸው እውነተኛ ኢትዮጵያዊያን ይወለዳሉ፣ ያድጋሉ፣ አወናባጆችንና ከዳተኞችን፣ የአገር ሸክሞችን አሽቀንጥረው ይጥሏቸዋል። እስከዚያ ድረስ ትግሉ ይቀጥላል እንጂ አይቋረጥም። የሰፊው ሕዝብ ፍላጎት መሟላቱ አይቀርም እስከዚያ ባለን አቅም ለዴሞክራሲ እንታገላለን።