ይህ የሰፊው ሕዝብ መፈክር በተለይ የፀረ አብዮት ኃይሎች አንድነታቸውን አጠንክረው አብዮታችን ከቅልበሳ አፋፍ ላይ በሚገኝበት በአሁኑ ወቅት እጅግ አንገብጋቢ መፈክር ሆኖ እናገኘዋለን። በዚህም የተነሳ ዛሬ ከምንጊዜውም ይበልጥ የተራማጆች ህብረት ከወረቀት ወደ ተግባር ከወሬ ወደ ተጨባጭ ትግል እንዲተላለፍ የተቻለውን ሁሉ ማድረግ የእያንዳንዱ እውነተኛ ማርኪስስት ሌኒኒስት ድርጅት ተግባር ነው እንላለን።

መኢሶን ደግሞ ደጋግሞ እንዳስታወቀው ሀቀኛ የሆነ የተራማጆች ህብረት ይፈልጋል። ለሱም ከመታገል አቋርጦ የሚያውቅበት ወቅት የለም። ዛሬም ይህንን የትግል አንድነት መስርተን በትግል እሳት ውስጥ እየተፈተንን ለመተዋወቅና ለመቀራረብ የሚያስችለንን ጥሪ ለእውነተኛ ማርክሲስት ሌኒኒስት ድርጅቶችና ለሌሎች ሀቀኛ አብዮታዊያን በይፋ ሲያቀርብ በዚህ የቆየ ጥረቱ አንድ እርምጃ ወደፊት ለማድረግ በማሰብ ነው።

የተራማጆች ህብረት በተግባር የሚተረጎመው ጥቂት ግንባር ቀደሞች ብቻቸውን አንዱንም ሳይዙት ከፕሮግራም መርሃ ግብር፣ ከመርሃ ግብር ድርጊት ፕሮግራም እያሉ በመንቆራጠጥ ብቻ እንዳይደለ የእስካሁኑ ትግላችን ያስገነዘበን ሀቅ ነው። ይህ ሁሉ ሲያቅትና እንዲሁም አልጨበጥ ሲል፣ ማርክሲስት ሌኒኒስት ድርጅቶች በሀገሪቱ ተጨባጭ ሁኔታ ላይ ምንም ፋይዳ ያለው ሚና መጫወት እያቃታቸው እያየ አሁንም ከስተታቸው ተምረው ወደ ሰፊው ሕዝብ ካልተዋሀዱና ከሰፊው ሕዝብ ተገንጥለው በጀመሩት “የግንባር ቀደም” ጉዞ ቢቀጥሉና ወደ ማርክሲስት ሌኒኒስቶች “ግንባር” “ቢጠናከሩ” በተጨባጭ መንገድ በድርጊት አንድነታቸውን በማጠናከር ላይ ባሉት አድሃሪዎች ላይ ሌላ ተራ ዛቻ መሰንዘር እንጂ ሌላ ምንም ትርጉም አይኖረውም።

ከብዙ ወራት ጀምሮ “የተራማጆች ህብረት ይጠንክር” እያለ ሲያስተጋባ የመጣው ሰፊ ሕዝብ መርሃ ግብር ካልነው በኋላ፣ የድርጊት ፕሮግራም ካልነው በኋላ፣ ዛሬ ደግሞ “ህብረት” ካልነው በኋላ “አልሰማ” ብሎ እንዲያውም “የተራማጆች ህብረት በተግባር ይተርጎም” ብሎ ማስተገባት መጀመሩ ከእስካሁኑ የአፍና የወረቀት እንጂ የድርጊት ህብረት አለመሆኑን በመረዳቱ እንደሆነ ግልጽ ነው! የኢትዮጵያ እውነተኛ ማርክሲስት ሌኒኒስት ድርጅቶች እንዲሁ ከተጨባጭና ከዕለታዊው የሰፊው ሕዝብ ትግል ተገንጥለው እስከተንሳፈፉ ድረስ ነገ ጠዋት ተነስተው “እንኳን ደስ ያለህ! ይኸው አሁንም እንደተለመደው ህብረታችን በመጠናከር ዛሬ ደግሞ ለሊቱን የወዛደር ፓርቲን መስርተንልህ አድረናል” ብለው ዱብ ዕዳ ሊያወርዱበት ይችላሉ። ሰፊው ሕዝብና አብዮታዊያን ግን ለዚያው በተግባር ለሚተረጎም የተራማጆች ህብረት መታገላቸውን፣ ለሀቀኛ የተራማጆች ህብረት ማስተጋባታቸውን ይቀጥላሉ።

ለምን? ምክንያቱም ሃቀኛ የተራማጆች ህብረት እንዲመሠረት፣ የተራማጆች ህብረት በተግባር እንዲተረጎም ከተፈለገ ማንም ቢሆን ዘሎ ሊያመልጣቸው የማይቻሉት ሳይንሳዊ ሁኔታዎች አሉና! ከነዚህ ዋና ዋናዎቹን ከሦስት ከፍለን እንጥቀሳቸው። አንደኛ ተራማጆች ህብረታቸው እንዲጠናከር በመሰረታዊ የአብዮት ጥያቄዎች ላይ ስምምነት ላይ መድረስ አለባቸው። ሁለተኛ እያንዳንዱ ድርጅት በእነዚህ መሰረታዊ ነጥቦች ላይ ተመርኩዞ አብዮቱ ለሚያቀርባቸው አንገብጋቢ ጥያቄዎች፣ ሰፊው ሕዝብ ግራ ለሚጋባባቸውና አመራር ለሚጠይቅባቸው ጥያቄዎች፣ ባጭሩ በየዕለቱ አብዮቱ ለሚያፈልቃቸው “ምን መደረግ አለበት” ለሚሉት ጥያቄዎች ግልጽ የሆነ የታክቲክ አቋሙን መጠቆምና በእርግጥ ለትግሉ አመራር ለመስጠት በግንባር ቀደምነት መቆም አለበት። ሦስተኛ እያንዳንዱ ድርጅት ይህንን ታክቲክ ይዞ መሰል ታክቲክ ካላቸው ጋር በጋራ ከሰፊው ሕዝብ ተዋህዶ መታገል፣ ሌላ ታክቲክ ካላቸው ጋር በይፋ ተከራክሮ በማመን ወይም በማሳመን የትግል አንድነትን ዲሞክራሲያዊ በሆነ ክርክርና መድረክ ለመመስረት መታገል ይኖርበታል።

ባጭሩ የተራማጆች ህብረት በአብዮቱ መሰረታዊ ጥያቄዎች ላይ በዲሞክራሲያዊ ውይይት ከሚፈልቅ የጋራ አቋም ይወለዳል። እንደዚሁ ከዲሞክራሲያዊ ውይይት በሚፈልቅ ተመሳሳይ ታክቲክ ተጨባጭነት ያገኛል። ይህንን የጋራ ታክቲክ ይዘው በሰፊው ሕዝብ ውስጥ በጋራ በመታገል በሚተዋወቁት፣ በሚቀራረቡት በጋራ ጠላት ፊት በጓድነትና በወንድማማችነት አብረው መቆምና መጋፈጥ የሚለምዱት ታጋይ አባሎች መራራ ትግል እየጠነከረና በተግባር እየተተረጎመ ይሄዳል። እንዲህ አይነቱ ህብረት የቁንጮች ብቻና የወረቀት ላይ ብቻ ሳይሆን በትግሉ ተጨባጭነትን የሚያገኝና የሚለመልም የየድርጅቱ ታጋዮች ከብረት የተጠነከረ ህብረት ነው። ሀሳባችን ከላይ አመራር አይኑር፣ ትንተና አይቅረብ መርሐግብር አይውጣ፣ የድርጊት ፕሮግራም አይነደፍ ለማለት እንዳልሆነ ግልጽ ነው። ይኽ ሁሉ ተንጠልጥሎ እንዳይኖር፣ ከአፍና ከወረቀቱ እንዳያልፍ ተጨባጭ ታክቲክን በየጊዜው መጠቆሙ ላይና አባሎችን በዚህ ግልጽ ታክቲክ መሰረት ወደ ሰፊው ሕዝብ ማዋሃዱ ላይም እናተኩር ለማለት ነው።

እንግዲህ ለተራማጆች ህብረት በተግባር መተርጎም ከላይ የተጠቀስናቸው ሦስት ነጥቦች አስፈላጊ ናቸው ካልን ዛሬ በሀገራችን ከእነዚህ ሦስት ነጥቦች አንፃር ያሉትን የህብረት ጠሮች በአጭር ባጭሩ እንመልከት።

የመጀመሪያው የተራማጆች ህብረት እንቅፋት በማርክሲስት ሌኒኒስት ድርጅቶች ውስጥ የጦፈ የሰርጎ መግባት ፖለቲካ ሲያካሄዱ በከረሙ የሲ አይ ኤ ቡችሎችና አድሃሪ ቢሮክራቶች አማካኝነት ቀልባሽ ኃይሎች በመሰረታዊ ጥያቄዎች ላይ ያለውን ስምምነት ለማደፍረስ የሚያደርጉት ግፊት ነው። በዚህ በኩል ከቅርብ ጊዜ ወዲህ አብዮቱ መሰረታዊ ጥያቄዎች ላይ የሚታየው የአቋም መንሸራተትና ማወላወል ለተራማጆች ህብረት መሰረታዊ እንቅፋት ነው እንላለን። አብዮታችን ብሔራዊ ዲሞክራሲያዊ አብዮት በመሆኑ ከዚህ መሰረታዊ ጥያቄዎች አንዱ ዲሞክራሲያዊ መብቶች ለጭቁኖች ያለአንዳች ገደብ አንዲታወቅ ለመታገል ሌላው ቀርቶ በብሔራዊ ዲሞክራሲያዊ አብዮት ፕሮግራም ላይ እንኳን ከስምምነት ከተደረሰ በኋላ የወዛደር ሊግ መሪዎች “ዲሞክራሲ ያለገደብ” አይሆንም በማለት ከፍተኛ መንሸራተት በማሳየት ላይ ይገኛሉ። ማሌሪድ “ምን እንዳገኘው ወይንም ምን እንዳገኘ ሳይታወቅ” በአስቸኳይ የሚለውን ቃል የተቀበልኩት እነዚያ “ከይሲዎች” አወናብደውኝ ነው ወደሚለው አባባል አዘንብሏል። “በትግላችን” የሚል “ሳይንሳዊ” ግን ደግሞ ፍፁም ተራ የማወናበጃ ቃል አንግቦ በአብዮቱ አጣዳፊ ጥያቄዎች ላይ ውዥንብር መንዛትን መርጧል። የኢትዮጵያ ሰፊ ሕዝብ ከግንድ ጋር እንዲታገልለት ካልፈለገ በስተቀር የዲሞክራሲ መብቶች ያለትግል እንደይገኙ መረዳቱን ዛሬ እንዳልደርሰበት ይታወቃል። ግን ይህ በማሌሪድ የሰሞኑ ቋንቋ “ገጽታና” ተጨማሪ “እምርታ” በዚህ አንገብጋቢ የአብዮቱ ጥያቄ ላይ ምን ያህል እንደተንሸራተቱ ያመለክታል። እዚህ ላይ በዝርዝር ባንገባበትም ዲሞክራሲን አፍኖ ይዞ የወዝአደር ፓርቲ ቀድሜ እመሰርታለው በማለት የዚያድ ባሬን አይነት የንዑስ ከበርቴና የቢሮክራሲውን ህብረት የሚያንጸባርቅ ቢሮክራሲያዊ ፓርቲ ለመመስረት መሯሯጥ፣ በጦርነቱ ሳቢያ ከፊውዳሊስቶች ፋሽስቶች የጦር መኮንኖችና ከአሜሪካን ኢምፔሪያሊዝም ጋር መልሶ ለመታረቅ ዳር ዳር ማለት ወዘተ ለተራማጆች ህብረት መሰረታዊ እንቅፋት መፍጠር መሆኑ ግልጽ ነው።

ሁለተኛው ለተራማጆች ህብረት በተግባር መተርጐም እንቅፋት የሆነው በመሰረታዊ ጥያቄዎች ላይ የአቋም አንድነት ማግኘት ብቻውን አብዮቱን ያራመድ ይመስል አንገብጋቢ በሆኑ የታክቲክ ጥያቄዎች ላይ አድርባዎችና ጎታቾች የሚያሳዩት የማድፈጥ ፀባይና በነዚህ የታክቲክ ጥያቄዎች ላይ ሊኖሩ ስለሚችሉት ልዩነቶች ይፋና ዲሞክራሲያዊ ውይይት ይልቅ እነዚህ አድርባዮችና ጎታቾች ለፊውዳል አሉባልታ የሚያሳዩት ድክመት ነው። 

በአንድ አብዮታዊ የትግል ወቅት ታክቲክ ስላለው ሚና ሌኒን ሲጽፍ “ያለ ታክቲክ ማቴሪያሊዝም በድን ነው” ብሏል። ይህ ችግር በሀገራችን እጅግ የተስፋፋ በመሆኑ አብዮታችን የግንባር ቀደም አመራር ችግር እንዳለበት ግልጽ ይመስላል። እርግጥ የዲሞክራሲ ያለመኖሩና ሀሳቦች በፍጥነት መንሸራሸር አለመቻላቸው ድርጅቶች ቶሎ ቶሎ ለሚለዋወጠው ሁኔታ የሚያቀርቡትን ታክቲክ ለሰፊው ሕዝብ ቶሎ ለማሳወቅ ችግር እንዳለባቸው ይገባናል። ነገር ግን እኮ “ህቡዕ” የሚከተው ዲሞክራሲ በሌለበት አካባቢ በይፋ ሊነገር የሚችለው በይፋ፣ በይፋ የማይቻለውን ለአብዮቱ እርምጃ የሚበጅ ነገር በነጻ ጋዜጣ አማካኝነት ለማሳተም እንዲቻል ነው!! በዚህ አቋምን በየጊዜው ባለመግለጽ በኩል የኢትዮጵያ ማርክሲስት ሌኒኒስቶች ሁሉ ከፍተኛ ድካም እንዳለብን መካድ ራስን ማታለል ብቻ ነው። በዚህም የተነሳ ለተራማጆች መተዋወቅና በጋራ ለመታገል ትልቅ እንቅፋት አለ እንላለን።

ይህንንም ስንል በየጊዜው በህቡዕ ጋዜጦች አቋም አለመውሰድ ለተራማጆች ህብረት እንቅፋት ሆኗል ስንል የወዛደር ሊግ መሪዎች እንደሚሞክሩት በተራ ብልጣብልጥነት ማምለጥም እንደማይቻል ግልጽ ነው። በተለይ በዚህ የተካኑት የወዛደር ሊግ መሪዎች አያደፍጡም። በየጊዜው “በህቡዕ” የድርጅታቸውን ህልውና የሚያረጋግጡ ወረቀቶች ይበተናሉ። ነገር ግን እነሆ ከሦስት አመት ጀምሮ ኢትዮጵያ አብዮታዊ ማእበል ውስጥ ገብታ እያንዳንዱ ሰዓት ለአብዮታዊያን የታክቲክ ጥያቄ እያቀረበች በምታፋጥጥበት ወቅት የወዝአደር ሊግ ይህንን ትቶ ስንት ወር ሙሉ ስለ አንድ ትሮትስኪ ስለተባለ የዛሬ አርባ አመት የሞተ የሩሲያ ፀረ አብዮተኛ ክፋትና “ጉድ” ለኢትዮጵያ ሕዝብ በተከታታይ “በህቡዕ” ይተርታል። ያ ሲያልቅበት ደግሞ ስለ እጅ አዙር ቅኝ አገዛዝ እና ስለ ቅኝ አገዛዝ አመጣጥና አስተዳደግ በሰፊው የኢትዮጵያ ሕዝብም ሆነ በአብዮታዊያን አዕምሮ ምንም አይነት ውዥንብር እንዳይኖር ነገሩን ከመሰረቱ ልቅም አድርጎ ለማስረዳት እንደዚሁ “በህቡዕ” በተከታታይ ቁጥሮቹ ይተርታል። በእውነቱ ይህ ሁሉ ክፋት የለውም የሚያቀርቡትም ጽሁፎች በመሠረቱ ጠቃሚም ሊሆኑ ይችላሉ። ግን ቁም ነገሩ ላይ አይደለም መጀመርያ ነገር በእውነቱ እነዚህ ጽሁፎች ጠቃሚ ናቸውና በአዲስ ዘመን ጋዜጣ ቢወጡስ? ሁለተኛ ነገር ደግሞ የወዛደር መሪዎች ልብ አላሉት እንደሆነ እንጂ ሰፊው የኢትዮጵያ ሕዝብ ስንት ሰአት ነው ሲላቸው ሃያኛው ክፍለ ዘመን ውስጥ እንደምንገኝ እኮ ነው “እቅጩን” በመመለስ ላይ ያሉት!

እንዲህ አይነቱ ከአንገብጋቢ ጥያቄዎች ደፈጣና ሽሽት ራሱ የተራማጆችን ህብረት ለመመስረት አስቸጋሪ ሁኔታ እንደሚፈጥር ግልጽ ነው። ግን ደግሞ ግልጽ አቋምን ማሳየትና የሌሎችን አቋም ግልጽ በሆነ ዘዴ መተቸት በሌለበት ሁኔታ የአንድን ድርጅት አቋም እንዳንድ ምናልባት የዚያ ድርጅት አባላት ናቸው ተብሎ የሚጠራጠሩ ግለሰቦች ከሚሰነዝሩት ሹክሹክታ መገመት፣ ሌሎች ከሚያናፍሱት የፊውዳል አሉባልታ ቀልቦ ማስተጋባት ይመጣል። ይህ ደግሞ እንኳን ህብረትን ሊያጠናክረ ይቅርና በተራማጆች መካከል የባሰ ቅራኔና አለመግባባትን ብለሀል አላልኩም፣ አቋምህ ነው አቋሜ አይደለም የሚሉትን መወነጃጀሎች ይወልዳል። የተራማዶች ህብረት በተግባር መተርጎም የዚያኑ ያህል የውሃ ሽታ ይሆናል።

ሦስተኛው የተራማጆች ህብረት ጠር ስምምነት የተደረሰባቸውን ነጥቦች እንኳን ከሥራ ላይ ለመዋል ወደሚችለው አንድ ኃይል ወደ ሰፊው ሕዝብ የመሄድን ተግባር የመናቅና የመፍራት በሽታና ሕብረቱን በቁንጮችና በወረቀቶች ለመወሰን የሚታየው የንዑስ ከበርቴ አዝማሚያ ነው። በተለይ ንዑስ ከበርቴው መደብ በሚያሳየው የዲሞክራሲ ፍራቻ የሚተረጎመው ይህ በሽታ የመጣው ይህን የህብረተሰብ ክፍል አብዮት እና በጸረ አብዮት መካከል አንጠልጥሎ ይዞ እዚያው በዚያው “ከበርቴም የሕዝብ ሰው” ከሚያደርገው የመደብ ጀርባው እንደሆነ መረዳት ያስፈልጋል። ደጋግመን እንዳልነው የንጉስ ከበርቴው መደብ መፈክሮችን መቅለብና ከሕዝብ ጋር ግራ እጅን አብሮ ማንሳት፣ በየወንዙ መማማል ያበዛል። ነገር ግን ደግሞ በዚያው ልክ ሰፊው ሕዝብ ታሪካዊ ሚናውን እንዳይጫወት ተንደርድሮ በፀረዲሞክራቲክ አቋሙ ግንባር ቀደም ረድፍ ለመያዝ የሚቀድመው የለም። ዛሬ የኢትዮጵያ ማርክሲስት ሌኒኒስት ድርጅቶች መፈክሮችን በተግባር መተርጎምና ግንባር ቅደም ሚና መጫወት አቅቷቸው ጭራሹን ቀድሟቸው በሄደው ሰፊ ሕዝብ “መፈክራችንን በተግባር ተርጉሙ” እየተባሉ ለመወትወት የበቁት ከዚህ የንዑስ ከበርቴ መደባዊ ጠባይ ገና በማያዳግም ሁኔታ ባለመለቀቃቸው እንደሆነ ግልጽ ነው።

ከላይ በዘረዘር ነው ሁኔታ በመመራት በተግባር ለሚተርጎም ለተራማጆች ህብረት እንታገል ዘንድ መኢሶን እውነተኛ ማርክሲስት ሌኒኒስት ድርጅቶችና ለሌሎች አብዮታዊያን የሚከተሉትን የትግል አቅጣጫዎች ይጠቁማል።

ሀ/ የተራማጆች ህብረት መሰረቱ የሚጠነክረው በአብዮቱ መሰረታዊ ጥያቄዎች ላይ አንድ አይነት አቋም ሲደረስና ሁሉም ድርጅቶች በዚያ አቋም ላይ ፀንተው ሲታገሉ በመሆኑ በዛሬው ወቅት ከላይ በጠቀስናቸው በሌሎችም መሰረታዊ ጥያቄዎች ላይ የሚደረገውን መሸራተት በሰፊው ሕዝብ ፊት እያጋለጡ በጋራ ለመታገል

ለ/ የተራማጆች ህብረት በተግባር የሚተረጎመው ይፋ በሆኑ የታክቲክ አቋሞች ተመርኩዘው የድርጅቱ አባላት በጋራ ሰፊው ሕዝብ ውስጥ ገብተው ሲታገሉ በመሆኑና የሚፈለገው ህብረት መሪዎች በወረቀት ላይ የሚነድፉት ብቻ ሳይሆን ታጋዮች በሰፊው ሕዝብ ውስጥ በተግባር የሚተረጉሙት ህብረት በመሆኑ ተጎታቾችን፣ አድፋጮችን፣ የቀኝ አድርባዮችን፣ ከአንገብጋቢ የታክቲክ ጥያቄዎች ፈርጣጮችን፣ የሕዝብ ንቀትና ፍራቻ የተቆራኛቸውን ንዑስ ከበርቴዎችን በጋራ ለመታገል፣ ጥራት እንዲኖርና የፊውዳል አሉባልታ እንዲቀንስ

ሐ/ ጓዶቻችን በዚህ መልክ ተሰማርተው በግንባር በቀደምትነት በሚዋጉበት ወቅት ከአድሃሪ ኃይሎች የሚሰነዘርባቸውን ተፅዕኖና ጥቃት ከሰፊው ሕዝብ ጋር ሆነን በጋራ ለመቋቋም ቆርጠን እንድንነሳ መኢሶን የትግል አንድነት ጥሪውን ያቀርባል።