ደም አናፈስም የሚሉት በላብአደሩ ደም ተበከሉ። የሰፊው ሕዝብ ወገነ ነን የሚሉት ሥራ ሥራ እያለ የሚጮኽውን ከርታታ በጥይት ቆሉት፣ በሰደፍ ቀጠቀጡት። ፋሽስትነታቸውን በገሃድ አስመሰከሩ። ጥቅምት 16 ቀን በሺ የሚቆጠሩ ሥራ አጦች በተሰበሰቡበት በኢሰአማ በር ላይ የሚያስቆጣ ፋሲታዊ ድርጊት ተፈጸመ፣ የብዙ ሥራ አጦች ደም ፈሰሰ፣ ብዙ ሥራ አጦች በደርጉ ቡችሎች ተደበደቡ፣ በፋሽስቶቹ ጥይት ተመትቶ ወዲያውኑ የሞተ የአንድ ከርታታ ሥራ ፈላጊ ሬሳ ብቻ እዚያው እወደቀበት ስፍራ ሲቆይ የቀሩት በሙሉ ወዲያውኑ ስለተወሰዱ ስንት እንደሞተና ስንት እንደቆሰለ እስካሁን በትክክል ማወቅ አልቻልንም። በማወናበጃ መሣሪያዎቹ ደርጉ የሰጠውን ቁጥር ግን ከእውነተኛው የራቀ መሆኑ አያጠራጥርም፣ እዚያው የነበሩት፡ ከጥይት የተረፉት የዓይን ምስክሮች፣ ግን ወዲያውኑ የሞቱት ከሦስት እንደማያንሱ ያረጋግጣሉ።

የጥቅምት 16ቱ ፋሽስታዊ ድርጊት ለምን አስፈለገ? በደርጉ የልመና መሳሪያ ጉርሻ በለመዱ ጥቂት ፀረ ሕዝብ ወታደሮች ሕይወታቸዉ የጠፋው፡ ደማቸው የፈሰሰውና በጠመንጃ ሰደፍ የተወገሩት ሥራ አጦች ኢትዮጵያ ትቅደምን የሚደግፉ ንፁሕ ኢትዮጵያውያን ነበሩ፣ በኃይለሥላሴ መንግሥትና በባእድ ከበርቴዎች አመጽ ከየሥራቸው የተባረሩ፣ የሚልሱት የሚቀምሱት ያጡ፣ ከነ ሙሉ ቤተሰባቸው በችጋር አለንጋ የሚገረፉ፣ መሰረታዊ መብቶቻቸው ተከብረው የሰፊውን ሕዝብ ኢትዮጵያ በሥራ ለመስቀደም የሚጓጉና የሚጥሩ ሰዎች ነበሩ። ታዲያ እነዚህ ሥራ አጥ ኢትዮጵያዊያን ሥራ ሥራ ስለአሉ በማንስ ላይ ቢሆን ምን የሰሩት በደል አለ? የማንንስ መብት ነክተዋል? ሥራ ይሰጠንና እንሥራ ማለቱሰ ምን ላይ ነው ‘ህገወጥነቱ’? ያለ ፈቃድ ተሰበሰቡ…. በፀጥታ አስከባሪዎች ላይ ድንጋይ ወረወሩ …ወዘተ የተባለው ፍጹም ሐሰት ማወናበጃ ነው። የስብሰባው ዓላማ ሥራ ስለማግኝት ጉዳይ ለመነጋገርና ደርጉ የሚሰጣቸውን መልስ ለመስማት ሲሆን ፍጹም ፀጥታ የተመላበት ነበር። ድንጋይ ወርውረዋል የተባለው ፍጹም ሐሰት ነው። ስብሰባ ለማድረግ አስቀድመው ጠይቀው 7/2/67 እስከ 22/2/67 ለአሥራአምስት ቀን ከኮ/በቀለ ተክሉ፡ የወንጀል መከላከል ምርመራ ረ/ዋና አዛዥ ፈቃድ ተሰጥቷቸዋል። ታዲያ ሁሉ እውቅ ሆኖ ሳለ የከርታታ ድሆችን ደም ያፈሰሰው፡ የስምንቶቹን አባት እንደወጣ ያስቀረው ‘የምርጦች’ መንግሥት እንዴት ይዋሻል?

ለጠቅላላው ሕዝብ ደህንነት የመጡ አስመስለው በወታደራዊው ደርግ ስም የሰፊውን ሕዝብ የላብና የደም ውጤት የቀሙት ጥቂት አወናባጅ መኮንኖች ስልጣንን በእጃቸው ካገቡበት ጊዜ ጀምሮ ብዙ ፋሽስታዊ ድርጊቶችን ፈጽመዋል። ኃይለሥላሴንና የብዝበዛ ጓደኞቹን አወረድንላችሁ እያሉ የሚደነፉብን ‘ምርጦች’ በሠራተኛው፣ በገበሬው፣ በሥራአጡ፣ በተራማጁ ወታደርና በጠቅላላውም በሰፊው ሕዝብ ላይ የፈጸሙት በደል ተዘርዝሮ አያልቅም። ‘ያለ ምንም ደም’ እያሉ ቢጨፍሩ፡ የመሳፍንትና የመኳንንት ደም እንዳይፈስስ ትልቅ ጥንቃቄ ቢያደርጉም በገጠርና በከተማ ብዙ የደሃ ደም አፍስሰዋል፣ የጠቅላላውን ሕዝብ መሰረታዊ መብቶች ገፍፈዋል፣ ‘መሬት ላራሹ’ ብለው የተነሱትን ጭሰኞች አስረዋል፡ በጥይት ቆልተዋል፣ የሠራተኛውን መብትና ጥቅም ለመጠበቅ መፍጨርጨር የጀመረውን የሠራተኞች አንድነት ማሕበርን አዳክመዋል፤ ወታደሮችን፣ ተማሪዎችንና ምሁራንን አስረዋል፣ አፍነዋል፣ ደብድበዋል፣ ረሽነዋል። እነዚህ ለሲአይኤ የተሸጡ አወናባጅ መኮንኖች ተራማጅ ወታደር ከመደብ ወንድሞቹ ጋር አብሮ በሕዝብ ጠላቶች ላይ የመዘዘውን ሰይፍ ወደ ሰፊው ሕዝብ እንዲያዞር በመገፋፋትና በማስገደድ ላይ ናቸው። የጥቅምት 16ቱ ደም ማፍሰስ የሚያመለክተው ይህንኑ ነው። ‘በዘመቻው’ ሳቢያ በዩንቨርስቲ ተማሪዎችና መምህራን ላይ የሚወሰደው እርምጃም ፋሺስታዊ ነው።

የእነዚህ ከርታታ ኢትዮጵያዊያን ንጹህ ደም ደመከልብ ሆኖ አይቀርም። ሰፊው ሕዝብ ፋሽስቶቹን በኃላፊነት የሚጠይቅበት ጊዜ ሩቅ አይደለም። ሰርተው እንዳይበሉ ሥራ የተነፈጉት፡ በፋሽስት ጥይት ሕይወታቸውን ያጡት ወንድሞቻችን ደም ትግላችንን ይበልጥ ያጠናክረዋል እንጂ አያዳክመውም። ጨቋኞች በሙሉ እስከተደመሰሱና [እስኪደመሰሱና- የአዘጋጆች እርማት] የሰፊው ሕዝብ ጥያቄዎች በሙሉ እስከተፈጸሙ [እስካልተፈጸሙ-የአዘጋጆች እርማት]ድረስ ትግሉ ይቀጥላል።