ሥራ የሃብት ምንጭ ነው። ሥራ ያለ ሠራተኛ ሊኖር አይችልም። ስለዚህ ሠራተኛ የሃብት የብልጽግና መሰረትና ፈጣሪ ነው። የህብረተሰብ ምሰሶና አውታር፣ ደግፎና ገትሮ ቀጥ አድርጎ የሚይዘው ሠራተኛ ነው። በጠቅላላው ሠርቶአደር ስንል በፋብሪካ በንግድ በግብርና በከብት እርባታና በሌሎችም ተግባሮች ላይ የተሰማራ በቀጥታም ሆነ በዘወርዋራ መንገድ ለሰው ልጅ ህይወት ተፈላጊ የሆኑትን ነገሮችና አገልግሎቶች የሚያበረክት ወይም በእንደዚህ አይነት ተግባር የሚሳተፍ ማለትን ያሰማል። ስለሆነም እዚህ ሠርቶአደር ወይም ሠራተኛ ስንል ጠበብ ባለ ትርጉም በፋብሪካ፣በንግድና በሌሎችም ተመሳሳይ የኢኮኖሚ ድርጅቶች ውስጥ በመቀጠር ጉልበታቸውን ወይም እውቀታቸውን እየሸጡ የሚኖሩ ማለታችን ነው።

ሠራተኛ በጉልበቱና በአእምሮው ኃይል ሃብት ይፈጥራል። ከሚፈጥረው ሀብት ግን የሚደርሰው በጣም አነስተኛ ነው። ከበርቴዎች አብዛኛውን እጅ ይወስዱበታል። በዚህ ምክንያት ከፍተኛ ብዝበዛና ምዝበራ፣ ጭቆናና ግፍ ይሠራበታል። በመደብ በተከፋፈለና የመንግሥቱን ስልጣን ባለአባቶችና ከበርቴዎች በያዙበት ህብረተሰብ ውስጥ ሠራተኛው የወዙን ፍሬ አየተበዘበ ከመኖር ሌላ ምንም አይነት ምርጫ እንደሌለው ታሪክ በጉልህ ይመሰክራል። ከዚህ አሰቃቂ ሁኔታ እራሱን ነፃ ለማውጣት የሚችለው በቆራጥነትና በአንድነት በመታገል ብቻ እንደሆነም ታሪክ ያስተምረናል።

በኢትዮጵያስ የሠርቶ አደሩ ሁኔታ እንዴት ነው? ይህ ነው የማይባል ብዝበዛ፣ ጭቆና፣ ግፍ አለበት፤ ህይወቱ ምድራዊ ሲኦል ነው ቢባል ማጋነን አይሆንም። የኢምፔሪያሊስቶች ቡችላ የሆነው አድሃሪው መንግሥት ሠራተኛውን ብሄራዊና በእዳን ከበርቴዎች እንደ እቃ እንዲጠቀሙበት አሳልፎ ሰጥቷቸዋል። አሰሪው ሠራተኛውን በፈለገው ደመወዝ ይቀጥረዋል፤ እንዳሰኘው ከሥራ ያባርረዋል። ሠራተኛው ምንም አይነት ዋስትና የለውም፤ የሥራው ሁኔታ እንዲሻሻልለት፣ የድካሙን ዋጋ እንዲያገኝ አሰሪውን ከመለማመጥ በስተቀር ሌላ ነገር ለማድረግ አይፈቀድለትም፤ ጭንቅ ሲሆንበት፣ ሲበዛበት፣ ሲያንገፈግፈው፣ የመጨረሻ መሣሪያው የሆነውን የሥራ ማቆም መብቱን ሊጠቀምበት በሚነሳበት ጊዜ የከበርተዎች ጥቅም ጠባቂ የሆነው ቡችላ መንግሥት በመጨቆኛና በመደምሻ ኃይሎች/ በፖሊስና በወታደር/ ያስጨፈጭፈዋል፤ ደሙን እንደ ክረምት ጎርፍ ለማፍሰስ አይመለስም። የከበርቴዎቹ ብዝበዛና ዘረፋ፣ የአድሃሪው መንግሥት ግፍ፣ በደልና ጭቆ እጅግ በጣም የበዛ ነው። ከዚህ ሁሉ አልፎ ይሄዳል። የኢትዮጵያ ሠራተኛ ከዓለም ሠራተኛ ውስጥ የባሰ የተጎሳቆለ፣ የተመዘበረ፣ የብዝበዛው ክብደት ያጎበጠው፣ የመጨረሻ ጭቁን መሆኑ የሚያጠራጥር አይደለም።

የኢትዮጵያ ሠራተኛ ከዚህ ከባርነት ራሱን ነፃ ለማውጣት ከባድ ትግል ሲያደርግ ቆይቷል። የአሜሪካ ኢምፔሪያሊዝም አሻንጉሊቶች ፀረሠራተኛ ሕግ በማውጣት ሠራተኛውን እጅና እግሩን ጠፍረው ለከበርቴዎች ከመስጠታቸው በፊት የፈረንሳይና ኢትዮጵያ የምድር ባቡር ሠራተኞች፣ የሲሚንቶ ፋብሪካ ሠራተኞች፣ የጥጥ ፋብሪካ ሠራተኛ ማህበር አቋቁመው የጭቆናውንና የብዝበዛውን ቀንበር ለመስበር ከባድ ትግል ሲያካሂዱ እንደነበር የሚወስ ነው። በሕግ እግርብረት ቢታሰርም ሠራተኛው መፍጨርጨሩን፣ መታገሉን አላቆመም፤ ከሰፊው ሕዝብ በተለይ ከተማሪው በመደጋገፍ የመደብ ጠላቱን ለመቋቋም ትግሉን ሲያካሂድ ቆይቶ ታሪካዊው የየካቲት ሕዝባዊ እንቅስቃሴ ፈነዳ።

የየካቲቱ እሳተጎሞራ ከመፈንዳቱና አገሪቷን ከማጥለቅለቁ በፊት በ1965 መጨረሻ ገደማ የኢትዮጵያ አየር መንገድ ሠራተኞች የኢትዮጵያ ንግድ ባንክ ሠራተኞች፣ በዚህ አመት /በ1960/ የወንጂና መተሃራ ስኳር ፋብሪካ ሠራተኞች፣ የመልካ ሰዲ የእርሻ ተክል ሠራተኞችና ሌሎችም ከባድና ቆራጥ ንቅናቄ በማድረግ፣ ሕይወታቸውን ጭምር በመሰዋት፣ በአሰሪዎችና በቡችላው መንግሥት ላይ ድልን መቀዳጀታቸው የታወቀ ነው። በየፋብሪካውና በየድርጅቱ ደረጃ የሠራተኛው ትግል እየተጠናከረና እየተፋፋመ ሲሄድ ታሪካዊው የካቲት ዱብ አለ።

በሌላ በኩል፣ በከፍተኛ ደረጃ ላይ የኢትዮጵያን ሠራተኞች በማጠቃለል የመሪነቱን ቦታ የያዘው ኢሠአማ በሠራተኛው ትግል እንቅስቃሴ ውስጥ ምን ስፍራ ነበረው? በየካቲቱስ የሰፊው ሕዝብ ታሪካዊ መነሳሳት ምን ነበረ አቋሙ? ሰፊውን ሠርቶአደር በሚገባ አሰልፎታል ወይ?

የኢትዮጵያ ሠራተኞች አንድነት ማህበር የሠርቶአደሩን አንድነት ለማጠናከር፣ መብቱንና ጥቅሙን ለመጠበቅ ሳይሆን፣ ለብዝበዛ ለዘረፋ ለጭቆና እንዲመቻቸው ለማድረግ ኢምፔሪያሊስቶች በተለይ አሜሪካኖች የፈጠሩት የከበርቴዎች መሳሪያ ነው። ላይ ላዩን አንድነት ይላል፤ ውስጥ ውስጡን ይከፋፍላል። በአፉ የሠራተኛን መብት አስከብራለሁ፣ ጥቅሙን አስጠብቃለሁ በማለት ያውጃል፤ በእርግጥ ግን የሚያደርገው የዚህን ተቃራኒ ነው። የእድሃሪው ፊውዶቡርዧ ጥገኛ መንግሥትና የአሜሪካ ኢምፔሪያሊዝም ጥገኛ ቡችላ በመሆን የኢትዮጵያን ሠርቶአደር ያስበዘብዛል፣ ያስጨቁናል፣ ያስደበድባል፣ ያስበድላል፣ የግፍ ግፍ ይሠራበታል።

የኢሠአማ መሪዎች የአሜሪካ ኢምፔሪያሊዝምና የቡችላው አድሃሪ መንግሥት ፍጡሮች ናቸው እንጅ ከሠራተኛው ውስጥ የወጡ የሠርቶአደሩ ወኪሎች አይደሉም። የሠራተኛውን አንድነትና ንቅናቄ ለማድከምና ለመስበር በልዩ ልዩ አይነት የተንኮል ዘዴ ይጠቀማሉ። በጥቅምና በመላሾ፣ በሹመት መደለልና ማባበል፣ በነገድ በጎሳ በሃይማኖት መከፋፈል፣ ማስፈራራት መወንጀል ማስከሰስ ማስገልበጥ ከሥራ ማስወጣት ማስደብደብ ማስገደል፣ በእነዚህና በመሳሰሉት ርካሽና እርኩስ ድርጊቶች በመጠቀም የሠራተኛውን የትግል ንቅናቄ ለመግታትና ለማዳከም በሙሉ ሃይላቸው እንደሚጥሩ የታወቀ ነው። የተሸጡት የኢሠአማ መሪዎች ይህንን ወንጀለኛ የአሠራር ዘዴ የወረሱት ከአሜሪካን ኢምፔሪያሊስቶች መሆኑን በቀላሉ ለመገንዘብ ይቻላል።

በየነ ሰሎሞን ለአሥራአንድ ዓመታት ቀንዳም የአሜሪካ ቡችላ በመሆን በኢሠአማ ላይ ነግሶአል። ከተላላኪነትና ከተራ ሠራተኛነት ተነስቶ በመለማመጥ፣ ጫማ በመላስ፣ ጭራ በመቁላት፣ ነገር በመሥራት፣ ለሲአይኤና ለፀጥታ መስሪያ ቤት ወሬ በማቀበል፣ በሠራተኛው ላይ በመሰለል፣ የኢትዮጵያ ሠራተኛ ንቅናቄ ወደፊት እንዳይራመድ አፍኖ ይዞታል። ለእግሩ እንኳን ጫማ ያልነበረው ምስኪን ዛሬ ትልቅ ዲታ ሆኗል። ቪላው በሁለት ሦስት ይቆጠራል፤ ዲታዎቹም እንደዚሁ፣ ንግዱ እርሻው፣ ስንቱ ተቆጥሮ እንደነ ጆርጅ ሚኒ እንደነ ጀምስ ሆፋ /ባለሚሊዮን ብር አሜሪካውያን ‘የሠራተኛ መሪዎች’/ ለመሆን ምንም ያህል አልቀረውም። ለምሳሌ ያህል ነው እንጅ በየነ ብቻውን አይደለም። እነ ፍሰሃጽዮንም ከሲአይኤ የሚያገኙት ገንዘብ ጉጉታቸውንና ስግብግብነታቸውን ስለአጋለባቸው ከሃብታሞች በመጋባት ከፍተኛ ስልጣንና ሃብት ለመጨበጥ ትግል በማድረግ ላይ ናቸው። ሌሎቹም እንደዚሁ ናቸው።ነገሩ ‘ከዝንጀሮ ቆንጆ ምን ይመራርጡ’ ነው።

ታጋዩንና ቆራጡን የኢትዮጵያ ሠርቶአደር ንቅናቄ ወደፊት እንዳይራመድ እንቅፋትና መሰናክል የሆኑት እነዚህ ይሁዳዎች፤ በየካቲቱም ታሪካዊ የሰፊው ሕዝብ እንቅስቃሴ ሠራተኛው ተገቢ ቦታውን እንዳይዝ ትልቅ ጥረት አድርገዋል። ከስር ሠራተኛው ፈንቅሏቸው ባይነሳ ኖሮ የአራቱም ቀናት ጠቅላላ ሥራ ማቆም አይደረግም ነበር። /እንዳልካቸውን በመደገፍ ፍሰሃጽዮን የሥራ ማቆሙን ውሳኔ ተቃውሞት ነበር። በተጨማሪም ሠራተኛው ሰላማዊ ሰልፍ እንዳያደርግ የኢሠአማ አድርባዮች አወናብደውታል።/ ከዚያም ወዲህ ሠራተኛው እነርሱን ወደዚያ ጥሎ ትግሉን በራሱ እንዳይቀጥል ነው። በተንኮላቸው እያጨናገፉትና እያወናበዱት ንቅናቄው መልክ እንዳይዝ፣ ቀጥታ ወደ ጠቅላላና ብሄራዊ ጉዳይ እንዳይተላለፍ፣ ከሰፊው ሕዝብ ጋር እንዳይሰለፍ፣ የትግሉን መሪነት እንዳይወስድ፣ ታሪካዊ ስፍራውን እንዳይዝ ከባድ እክል መሆናቸውን አስመስክረዋል። ሠራተኛው እነዚህን እስስቶች የሚያስወግድበት ጊዜው ሩቅ መሆን የለበትም። የሠራተኛው ንቅናቄ ደንበኛውን አቅጣጫ ሊይዝ የሚችለውና ትግሉ በከፍተኛ ደረጃ ላይ ሊካሄድ የሚችለው እነዚህን ተንኮለኞች አድርባዮች በቅድሚያ ሲያባርር ብቻ ነው። አሁን በቅድሚያ ሠርቶአደሩ ሁሉ እነዚህን የሲአይኤ መሳሪያዎች ድራሻቸውን ማጥፋት ይኖርበታል።

ኢሠአማ የኢትዮጵያ ሕዝብ ጠላት፣ የአሜሪካ ኢምፔሪያሊዝም፣ የሲአይኤ ምሽግ መሆኑ መቅረት አለበት። ኢሠአማ የኢትዮጵያን ወዛደር መብት አስከባሪና ተቋም ጠባቂ፣ የኢትዮጵያ ሰፊ ሕዝብ አደራጅና መሪ መሆን አለበት። ወደፊት ተራማጅ እንጅ ወደ ኋላ ተመልካች የፊውዶቡርዧው አድሃሪ መንግሥትና የበላይ ጠባቂው የአሜሪካ ኢምፔሪያሊዝም የስለላና የጸረሕዝብ ወንጀሎች መፈፀምያ፣ የሲአይኤ አፋኝ ጓድ ማፊያ መሆን የለበትም።

እዚህ ላይ ግልጽ መሆን ያስፈልጋል። ለኢምፔሪያሊዝምና ለአድሃሪው መንግሥት የተሸጡትን ደላሎችና ሰላዮች ማውገዛችንና ማጋለጣችን ነው አንጅ የኢትዮጵያን ሠራተኞች አንድነት፣ ኢሠአማን መቃወማችን አይደለም። ይህ ያለአንዳች ጥርጣሬ በግልጥ መታወቅ አለበት። ኢሠአማን የሚመሩ፣ ከሠራተኛው ወገን የሆኑ፣ ሌሎች ሃቀኞችና ትጉሆች ለሠራተኛውና ለሰፊው የኢትዮጵያ ሕዝብ የሚያስቡ፣ የሚቆረቆሩ ችሎታ ያላቸው መሪዎች መሆን አለባቸው። ሠርቶ አደሩ እንደዚህ አይነት መሪዎች አሁን ቶሎ ብሎ ይምረጥና ታሪካዊ ሚናውን ይያዝ ነው የምንለው። ልዩነቱን ደህና አድርጎ መገንዘብ ያሻል።

ኢሠአማ ቶሎ ብሎ እነዚህን ወደ ኋላ ጎታች የሲአይኤ ቡችሎች ያባርር ስንል፤ በየካቲት ፈንድቶ በመገንፈል ላይ ባለው የሰፊው የኢትዮጵያ ሕዝብ የትግል እንቅስቃሴ ውስጥ ተገቢና ታሪካዊ ስፍራውን እንዲይዝ በማለት ነው። ይህ ታሪካዊ ስፍራው ምንድነው? የትግሉን አላማ /አይዲዮሎጂ/ መግለጽ እና ማብራራት፣ የሰፊውን ሕዝብ ትግል በደንብ ማደራጀት፤ ደሀውና መሬት አልባ የሆነ ጢሰኛ ገበሬ /ከጠቅላላው ሕዝብ 80% ገደማ የሚሆነው ነው/ ለመሠረታዊ ለውጥ የሚደረገውን ትግል በደንብ እንዲደግፍና ከሠራተኛው ጋር አብሮ እንዲሰለፍ አስፈላጊውን ማድረግ፣ ዝቅተኛው ነጋዴ፣ ጠቢቡና ባለእጁ፣ ሥራአጡ፣ በድርብ ብዝበዛና ጭቆና ስር የሚማቅቁት ብሄረሰቦች ወታደሩና ምሁሩ ወዘተ. በሠራተኛው የትግል ባንዲራ ስር እንዲሰለፉ ማድረግ የኢሠአማ አብይ ተግባር ነው። ይህ ነው የኢሠአማ ታሪካዊ ሚና።

የኢሠአማ /ጠቅላላው የኢትዮጵያ ሠራተኞች/ ዋና ግዜያዊ ተግባር ምን መሆን አለበት?

1. ኢሠአማን ፀረሠራተኛ ከሆኑት ከአሁኖቹ መሪዎችና ከአደገኛው የአሜሪካ የስለላ ድርጅት ማጽዳትና ነፃ ማውጣት፣ ለሠራተኛ መብትና ጥቅም በሀቅና በትጋት የሚሰሩ መሪዎች ከሠራተኛ መካከል በአስቸኳይ መምረጥ፣
2. በአሁኑ መሪዎች ደንታ ቢስነትና ከሃዲነት ከሥራ የተባረሩት በብዙ ሺ የሚቆጠሩ ሠራተኞች ቶሎ ብለው ወደ ሥራቸው እንዲመለሱ፣ ማንኛውም ሠራተኛ ከሥራ እንዳይወገዱ፣ የኑሮ ዋጋ ማስተካከያ ደሞዝና ሌሎቹም መንግሥት በገባው ቃል መሠረት እንዲፈፀሙ አጥብቆ መታገል፣
3. በመካሄድ ላይ ያለውን የሰፊውን ሕዝብ እንቅስቃሴ መልክ መስጠት፣ ማቀናበር፣ ማደራጀትና መምራት፣ በእንቅስቃሴው ውስጥ የበለጠ እንዲሳተፍ አስፈላጊውን ሁሉ ማድረግ፣
4. በሠርቶአደሩ አይድዮሎጂ ስር ከተሰለፉት ግንባር ቀደም ምሁራን ጋር በአንድነት በመተባበር፣ የሰፊውን ሕዝብ ዴሞክራሲያዊ ትግል የሚያደራጅ፣ የሚያቀናብርና የሚመራ አንድ አጠቃላይ ዲሞክራሲያዊ የፖለቲካ ድርጅት ማቋቋም፣
5. የሰፊ ዲሞክራሲያዊ መንግሥት በቅርብ እንዲመሰረት፣ እስከዚያው ድረስ አሁኑኑ ከሰፊው ሕዝብ የተወጣጣ ጊዜያዊ መንግሥት እንዲቋቋም ካሁኑ ጀምሮ መሰረታዊ ሰብአዊና ብሄራዊ መብቶችና ነፃነቶች አስፈላጊው ዋስትና ተሰጥቶ ሥራ ላይ እንዲወሉ እንዲደረግ አጥብቆ መታገል።