የአንድ ንቅናቄ አብዮታዊነት ሊለካ ከሚችልበት ነገሮች አንዱ ፀረ አብዮት ኃይሎች በዚያ ንቅናቄ ላይ ሊያደርሱ የሚሞክሩት ጥቃት ነው። የተለያዩ የአድሃሪዎችን መስመሮች እያጋለጠ፣ አወናባጅ መፈክሮችን ሁሉ ተራ በተራ እየተዋጋ፣ “ለነቃ፣ ለተደራጀና ለታጠቀ ሕዝባዊ ዓመፅ” ብሎ ለረጅሙና መራራው የነፃነት ተጋድሎ የተሰለፈው ድርጅታችን በዚህ በኩል ብዙ ጥቃቶች እንደደረሱበት ግልጽ ነው።

በተለይ ከአንድ አመት ወዲህ በየጊዜውና በየቦታው የመኢሶን አባላትና ደጋፊዎች ከሌሎች የአብዮትና የትግል ጓዶቻቸውን ጎን ለኢትዮጵያ ጭቁን ሕዝቦች ነፃነት የሚጠበቅባቸን የደምና የመስዋዕትነት አስተዋኦ እየከፈሉ አልፈዋል። ሌላው ቀርቶ በዚች በያዝናት ሳምንት እንኳን ብዙ የመኢሶን አባላትና ደጋፊዎች “የነቃ፣ የተደራጀና የታጠቀ የሕዝብ አመፅ ሸንፋል” የሚለውን አብዮታዊ ዓርማ አንግበው ከጠላት ኃይሎች በተተኮሱ ጥይቶች ሕይወታቸውን ለውድ እናት አገራቸው ሰውተዋል። ነገር ግን መኢሶን የሚደርስበት፣ መኢሶን የሕዝብ ወገንነቱን የሚያስመሰክርበት ጥቃት ይህ ብቻ አይደለም።

የግልገል ፋሽስቶቹ ቡድን እንደ ዛሬ ከሲአይኤና ከኢዲዩ ጋር ሆኖ ተራ ነፍሰ ገዳይ ቡድን ከመሆኑ በፊት መኢሶን የሚከተለውን የፖለቲካ መስመር የተሳሳተና ፀረ ሕዝብ መስመር ለማስመሰል ብዙ ትግል አካሂዶ እንደነበረ ይታወሳል። ነገር ግን በአብዮታዊውና በፀረ አብዮቱ መስመር መካከል በተካሄደው የርዕዮዓለም ትግል መኢሶንና ሌሎች አብዮታዊያን በአሸናፊነት ወጡ። ኢህአፓም ወደ ተራ ነፍሰ ገዳይነት፣ ወደ ነጭ ሽብር ተሰማራ። ነገር ግን ዛሬም ቢሆን ምንም እንኳን አብዮታዊያን ከቅጥር ነፍሰ ገዳዮች ጋር አስከፊ የሆነ ትግል በማካሄድ ላይ ቢሆኑም ፀረአብዮት ኃይሎች በፕሮፖጋንዳው መሰክ በመኢሶን ላይ የሚያካሄዱትን ዘመቻ አላቆሙም። እንዲያውም መኢሶን ከእለት ዕለት እየተጠናከረና በወዛደሮች፣ በአርሶአደሮች፣ በመለዮ ለባሾች፣ በወጣቶች፣ በጭቁን ብሔረሰቦች፣ በአገር ወዳዶች፣ በምሁራንና በጭቁን ሴቶች አካባቢ ተቀባይነትን እያገኘ በመሄዱ አድሃሪዎችን አስደንግጧቸዋል። በዚያው ልክ ደግሞ ውስጥ ውስጡንና በይፋ፣ በቀጥታና በተዘዋዋሪ በመኢሶን ላይ የሚሰነዘሩት አሉባልታ መጠን እየሳተ ሲሄድ እናየዋለን።

እነዚህን አሉባልታዎች በተለይ ዛሬ አገራችን በስንት ችግሮች ተውጣ እያየናት እዚህ ላይ ማንሳታችን ለነሱ ዋጋ ለመስጠት አይደለም። አሉባልታ፣ ሃሜት፣ በተገለፀ አቋም ላይ ሳይሆን ባልተባለ እና ባልተጻፈ ባልተነገረ ጉዳይ ላይ አንድን ንቅናቄ መተቸት የሚያሳየው ምንድነው? ቢያንስ ሁለት ነገሮችን ያሳያል። አንደኛ፣ አድሃሪዎችና አድርባዮች በአንድ ንቅናቄ ላይ አሉባልታ ሲያበዙ ያ ንቅናቄ በያዘው አብዮታዊ አቋም የተነሳ ለጠላቶቹ ከአሉባልታና ከፊውዳል ሀሜት ሌላ መፈናፈኛ ነስቷቸዋል ማለት ነው። ይህ ደግሞ ለዚያ ንቅናቄ በጣም ጥሩ ነገር ነው። ሁለተኛ ደግሞ፣ ሌኒን እንዳለው በአሉባልታ መጠቀም የፖለቲካ ክስረት አስተማማኝ ምልክት ነው። ይህም ለአብዮቱ በጣም ጥሩ ነው። ምክንያቱም በተለይ አድርባዮች በመኢሶን ላይ የሚሰነዝሯቸው አሉባልታዎች የሚያጋልጡት መኢሶንን ሳይሆን ራሳቸውን የከሠሩትን “አጋላጮች” እንደሆነ ግልጽ ነውና።

ነገር ግን ይህንን ስላልን አሉባልታዎች አደጋ የላቸውም ማለት አይደለም። ዝም ብለው ከተጠራቀሙ አድሃሪዎችና አድርባዮች የአብዮቱን ሰፈር ለመከፋፈል ለማጋጨትና ለማዳከም ሊጠቀሙባቸው ይችላሉ። እንዲያውም ዛሬ ሀገራችን በብዙ ችግሮች ተዋጥራ በእነዚህ ጉዳዮች ለመፃፍ መነሳታችን ዛሬ በመኢሶን ላይ የተጠራቀሙት አሉባልታዎች ከመግነናቸው የተነሳ ተራማጆችን ሊያጋጩና የአብየቱን ሰፈር ሊከፋፈሉ የሚችሉበት አደገኛ ደረጃ ላይ ደርሰዋል ብለን በማመናችን ነው። ስለሆነም የዚህ ጽሁፋችን አላማ በአድሃሪዎች የመከፋፈል ሴራ በተራማጆችና በሰፊው ሕዝብ ሰፈር የተነዛው አደገኛ ውዥንብር እንዲጠራና የአብዮቱ ሰፈር በዚያው ልክ ጥራትና ጥንካሬ አገኝቶ ቆራጥ ትግል ለማድረግ ነው። ለምሳሌ ያህል አድሃሪዎች ተራማጆችን ለመከፋፈል በመኢሶን ላይ ከነዟቸው አደገኛ አሉባልታዎቸ አንዳንዶቹን እንጥቀስ።

መኢሶን በጊዜያዊ ወታደራዊ መንግሥት ላይ ከአድርባይነት የራቀ የአብዮታዊ ሂስ አቋም እንዳለው የታወቀ ነው። መኢሶን ከጊዜያዊ ወታደራዊ መንግሥት ጋር ያሉት ልዩነቶች አሁንም በአብዮቱ ሰፈር ያሉ ልዩነቶች ናቸው ብሎ ያምናል። አድሃሪው ቢሮክራሲ ግን እነዚህን ልዩነቶች በማጉላት ተራማጆችን ይበልጥ ለመከፋፈልና ለማጋጨት ይሞክራል። አድሃሪው ቢሮክራሲ በየመጠጥ ቤቱና በየስርቻው ላይ የሚያስመራውን ትተን መኢሶንን ለማስመታት ባለፉት 15 ቀናት እንኳን የጠነሰሳቸውን ሁለት ሴራዎች እንመልከት።

ሰኔ 20 ቀን መኢሶን በት/ቤቶች ትምህርት እንዲቆም፣ በፋብሪካዎች ሥራ እንዲቆም አድማ እያስደረገ ነው በማለት ለመንግሥት “መረጃ” በማስተላለፍ በደርግና በመኢሶን መካከል ያለውን ልዩነት ለማባባስ ሞክሮ ነበር። ይህ ሲከሽፍ ደግሞ ሊቀመንበሩ ከሊቨርቪል ሲመለሱ መኢሶን በደርግ ላይ ሰላማዊ ሰልፍ ለማድረግ አስቧል ብሎ አሁንም መሰረተ ቢስ ወሬ በማቅረብ እንደዚሁ በደርግና በመኢሶን መካከል ያለውን ልዩነት በአሉባልታ ተጠቅሞ ለማስፋት ሞክሮ እንደነበር የታወቀ ነው።

ነገር ግን በእንደዚህ አይነቱ ዘዴ የሚጠቀመው የለየለት አድሃሪ ብቻ አይደለም። መሰረታዊ የኢትዮጵያ አብዮት ጥያቄዎች ላይ ትክክለኛ አቋም በይፋ መቃወም ተስኖት፣ በሌላ በኩል ደግሞ በእነዚህ አቋሞች የተነሳ መኢሶን ከእለት እለት ተቀባይነትን እያገኘ ሲሄድ እያየ ዝም ማለት ጨንቆት ውጭ ነፍስ ግቢ ነፍስ ላይ የሚገኝ አስመሳይ ተራማጅና አድርባይ ክፍልም አለ። ይህም ወገን ከፊውዳል አሉባልታ ሌላ መኢሶንን የሚዋጋበት ምንም ሌላ የረባ መሳሪያ የለውም። ስለዚህ እሱም እኩል ያሉባልታ ዘመቻ ያካሂዳል።

መኢሶን በኢትዮጵያ አብዮት መሰረታዊ ጥያቄዎች ላይ ግልጽ የሆኑ አቋሞች አሉት። እነዚህ አቋሞቹ የተጠናከሩትና ጥራት ያገኙት መኢሶን እንዲሁ በወረቀት ላይ አቋሜ ይህ ነው ብሎ ስላሰፈራቸው አይደለም። ተቀባይነትን ያገኙት ከተጨባጩ የኢትዮጵያ ሁኔታ አብዮቱን ወደፊት የሚያራምደው አቋሞች በመሆናቸውና መኢሶን እነዚህን ያመነባቸውን አቋሞች ከሥራ ላይ ለማዋል በጓዶቹ ደም እየከፈለ በሰፊው ሕዝብ ዘንድ ታጋይነቱን በማስመስከሩ ነው።

እነዚህ ግልጽ አቋሞች ምንድናቸው? ሌሎች “አገራችን ጦርነት ውስጥ ነችና በአሁኑ ጊዜ የዲሞክራሲ መብቶች አያስፈልግም” እያሉ የሰፊውን ሕዝባዊ ተሳትፎ “ከተያዘው ትግልና ጦርነት በድል አድራጊነት እንድንወጣ የዲሞክራሲ መብቶች ለጭቁኖች ያለ ገደብ መታወቅ አለባቸው” በማለት እምነቱ በሰፊው የኢትዮጵያ ሕዝብና በሰዉ ላይ ብቻ እንደሆነ እየደጋገመ ያስታውቃል። ሌሎች “ዲሞክራሲ ሊፈቀድ የሚችለው ዛሬ ሳይሆን በአንድ ባልታወቀ ታምረ-እግዚአብሄር የተራማጆች ህብረት ተጠናክሮ ወደ ውህደት ከተለወጠ በኋላ ነው” እያሉ የሃቀኛውን የትግል አንድነት ዘመን ሲያራዝሙ መኢሶን “የተራማጆች ህብረት እንዲጠናከር ዲሞክራሲ ለጭቁኖች ያለገደብ መታወጅ አለበት” በማለት ይታገላል። ሌሎች ኢምፔሪያሊዝምን በቅድሚያ እንዋጋ በማለት ከውስጥ ጠላቶቻችን በተለይ ደግሞ ከአድሃሪው ቢሮክራሲ በኩል የሚመጣውን አደጋ ችላ ሲሉት መኢሶን በአሁኑ ወቅት የውስጥና የውጭ ጠላቶች በምንም አይነት ሊነጣጠሉ የማይችሉ በአንድነት መመታት ያለባቸው ናቸው ብሎ ያምናል። ሌሎች የበሰበሰውንና አሁንም በረቀቀ ዘዴ ተደራጅቶ አብዮታችንን ለመቀልበስ ሌት ተቀን የሚያሴረውን ቢሮክራሲ “ለጊዜውም ቢሆን ልንጠቀምበት እንችላለን” ብለው አብዮቱ አንገት ላይ የተጠመጠመውን እባብ እሹሩሩ ሲሉ መኢሶን ሳይንሳዊ በሆነው የማርክስ ትምህርት በመመርኮዝ አድሃሪው ቢሮክራሲ መደምሰስ አለበት ብሎ ከሰፊው ሕዝብ ጎን ይታገላል። ሌሎች አብዮታውያን በየዕለቱ ከጎናችን እየተቀነጠሱ ሲረግፉ “ታጋይ ይሞታል እንጂ ትግል አይሞትም” በሚለው መፈክር እራሳቸውን አጉል ለማጽናናት ሲሞክሩ መኢሶን በአገራችን ተጨባጭ ሁኔታ “ታጋይ ሲሞት ትግል እንዳይሞት” የቢሮክራሲውን አሻጥር እንቋቋም፣ ያስጠቃን ወደ ተከላካይነት ማሸጋሸግ ነው፤ አብዮታችን በሰፊው ሕዝብ ነፃ እርምጃዎች አማካኝነት እንደገና ወደ አጥቂነት ይሸጋገር ይላል።

በዚህ መልክ ብዙ የመኢሶንን አቋሞች እየዘረዘሩ ማሳየት ይቻላል። በጠቅላላው በአሁኑ ጊዜ ሰፊው የኢትዮጵያ ሕዝብ በራሱ በመተማመን በነቃ፣ በተደራጀና በታጠቀ ሕዝብ አመጽ ጠላቶቹን ሁሉ ደምስሶ የታሪካዊት እናት ሀገሩን ብሄራዊ ክብርና ነጻነት ሳያስነካ አብዮቱን ከግቡ ለማድረስ በሚያደርገው ትግል ከጎኑ የቆመ ድርጅት ነው። ለዚህም የሚከተለውን ታክቲክ በየጊዜው በአንገብጋቢ ጥያቄዎች ላይ ሁሉ በይፋ አቋም እየወሰደ የሚታገል ድርጅት በመሆኑ ተራማጆችና ሰፊው ሕዝብ አቋሞቹን ያውቃሉ። አድሃሪዎችና አድርባዮች መኢሶንን በነዚህ መሰረታዊ አቋሞች ላይ ሊታመኑ አይችሉም። ስለሆነም እንደሁኔታውና እንደአካባቢው እያዩ የተለያዩ አሉባልታዎችን በመሰንዘር ድርጅታችንን ለማዳከምና ከሰፊው ሕዝብ ለመነጠል አጉል መፍጨርጨር ያደርጋሉ። ከነዚህ አሉባልታዎች አንዳንዶቹን ብንጠቅስ የሚከተሉትን እናገኛለን።