1. በአብዮትና በቢሮክራሲ መካከል ስለ መምረጥ

የሕዝብ ድርጅት ጉዳይ ጊዜያዊ ጽ/ቤት የማቋቋም ጉዳይ በደርጉ ውስጥ ኃይለኛ ትግልን አስከትሎ እንደነበረና በደርጉ ውስጥ ያሉት ተራማጆች ከዚህ ትግል አሸናፊ ሆነው በመውጣታቸው ጽ/ቤቱን ሊቋቋም እንደቻለ ይታወቃል። ጽ/ቤቱ ከተቋቋመም በኋላ የኢትዮጵያን ብሄራዊ ዲሞክራሲያዊ አብዮት ፕሮግራም በይፋ ለማውጣት ትልቅ ትግል እንደነበረና ከዚህም ላይ የደርጉ አድሃሪዎች — እነ ሲሳይ ሃብቴ — ተሸንፈው ፕሮግራሙ ሊወጣ እንደቻለ ይታወቃል። ይሁንና በደርጉ ውስጥ በጽ/ቤቱ ጥያቄ ላይ የነበረው ትግል አላቆመም። እነ ዓለማየው ኃይሌ ከሰኔ 68 ጀምሮ በጽ/ቤቱ ላይ እና በተለይም ደግሞ በድርጅታችን ላይ ኃይለኛ ዘመቻን በይፋ ሲያካሄዱ እንደ ቆዩ፣ ጽ/ቤቱን የመኢሶን ጽ/ቤት ነው በማለት እንዲፈርስ መጠየቃቸውና በመጨረሻው ይህንኑ የማፍረስ አላማቸውን በጉልበት  ከሥራ ላይ ለማዋል እንደ ሞከሩ ይታወቃል።

አሁን በጥር 26 በደርጉ ውስጥ የነበሩት የኢህአፓና የኢምፔሪያሊዝም ወኪሎች ከተደመሰሱ በኋላ፣ በጽ/ቤቱና በእርሱም ሳቢያ በመሲሶን ላይ የሚደረገው ዘመቻ በተፋፋመ ሁኔታ ቀጥሏል። የዚህ ዘመቻ ዋነኛ ኃላፊዎች ከየቦታው የተቀመጡት አድሃሪ ቢሮክራቶች ናቸው። በሲዳሞ፣ በከፋ፣ በጎጃምና በሌሎችም ክፍላተሃገር ቢሮክራሲው ጽ/ቤቱን በሚመለከተው በኩል “ከተከላካይነት ወደ አጥቂነት” ተሸጋግሮ ካድሬዎችን እስከማስገደልና እስከማሳሰር ደርሷል።

ጊዜያዊ ወታደራዊ መንግሥት ከተቋቋመበት ጊዜ ጀምሮ በአብዮታዊና በቢሮክራሲያዊ አሰራር መካከል በአብዮታዊያንና በቢሮክራቶች መካከል በተለያዩ ጊዜያትና በተለያዩ ጥያቄዎች ላይ ከሁለቱ አንዱን የመምረጥ ግዴታ እየቀረበለት እንደ ሁኔታውን መርጧል። አብዮታዊ አሰራርንና አብዮታዊያንን በመረጠ ቁጥር የኢትዮጵያውያን ሕዝብ ትግል ወደፊት አራምዷል። ቢሮክራሲያዊ አሰራርንና ቢሮክራቶችን በመረጠ ቁጥር ደግሞ ፀረሕዝብና ፀረአብዮት እርምጃዎችን ወስዷል። አሁን እንግዲህ ከጥር 26 በኋላ ይህ መንግሥት እንደ ገና ከዚህ ምርጫ ጋር ተፋጧል። በደርጉ ውስጥ የነበሩት አድሃሪዎች ከተደመሰሱ በኋላ ፖሊሲያቸው ግን ይቀጥል እንደሁ[እንደሆን]፣ በመደቦች ትግል ፈንታ የመደቦች ዕርቅ እንደገና በመፈክርነት ይቀርብ እንደሁ[እንደሆን] እንግዲህ በሚመጡት ጥቂት ቀናትና ሳምንታት ውስጥ ለሰፊው ሕዝብ ግልፅ እንደሚሆን እናምናለን።

የሕዝብ ድርጅት ጉዳይ ጽ/ቤትን ካድሬዎች በሚመለከተው በኩል፣ በእርግጥ እነዚህ ጓዶች በአንዳንድ ቦታዎች ስህተቶችን እንዳደረጉና እንደሚያደርጉም የማይታበል ሀቅ ነው። የጽ/ቤቱ ጓዶችም ሆኑ ሌሎች አብዮታዊያን በሚፈጽሟቸው ስህተቶች ላይ ሊኖር የሚችለው አስተያየት ከሁለት አንድ ነው፡— ወይ ከነኢ.ድ.ህ- ኢ.ህ.አ.ፓ- ኢምፔሪያሊዝም ጋር የገቢር ግንባር በመፍጠር በጽ/ቤቱና በካድሬዎቹ ላይ የጥላቻና የስም ማጥፋት ዘመቻን ማካሄድና እንደዚሁም የጭቆና እርምጃዎችን መውሰድ ነው፤ ወይም በአብዮታዊ አሰራር ዘዴ ስህተቶች እንዲታረሙ ማድረግ ነው። ጊዜያዊ ወታደራዊ አስተዳደር ደርግና በየገጠሩ የተሰማሩት አባሎቹ ይህኛውን መንገድ እንደሚመርጡ ተስፋ እናደርጋለን። የጽ/ቤቱ ጓዶች በበኩላቸው የቀረቡባቸውን ክሶችና ያደረጓቸውንም ስህተቶች ለማጥናት፣ ለመተራረምና የአሰራር ዘዴያቸውን ለማስተካከል የአስር ቀናት ሴሚናር እንዳካሄዱ ይታወቃል። በዚህ ሴሚናር ላይ በትክክል የቀረቡባቸውን ሂሶች ተቀብለው ስህተቶቻቸውን እንዲያርሙ ዋና ምኞቻችን ነው።

2. ቀይ ሽብር

ከረጅም ጊዜ ጀምሮ በሰፊው ሕዝብ ሲጠየቅ የነበረውን ነጭ ሽብር አብዮታዊያን ቀይ ሽብር የመተካት ጥያቄ ባሁኑ ወቅት ከሥራ ላይ እየዋለ ነው። በየክፍለ ሃገሩና በተለይም በአዲስ አበባ የኢትዮጵያ ወዛደሮች፣ አብዮታዊ ወጣቶችና አብዮታዊ መለዮ ለባሾች በእርግጥ አብዮቱን ከተከላካይነት ወደአጥቂነት በማሸጋገር ላይ ይገኛሉ። በፀረአብዮቱ ሰፈር ቀይ ሽብር ተፈጥሯል።

የተፈጠረው ቀይ ሽብር ሁለት ያስተሳሰብ መስመሮችን ለይቷል። አንደኛው መስመር የኢምፔሪያሊዝም እና የአድሃሪዎች ሁሉ ሲሆን፣ እርሱም ቀይሽብርን በጠቅላላ ግርግር፣ በከንቱ ግድያ፣ በሥርዓትና በሕይወት ዋስትና መጥፋት፣ በመንግሥት አለመኖር ይተረጉመዋል። ለስድስት ወራት ሙሉ በአብዮቱ ሰፈር ነጭ ሽብር ሲሰፍን አድሃሪዎች ሥርዓት ጠፋ፣ መንግሥት ጠፋ አላሉም ነበር። እያንዳንዱ ጓድ፣ እያንዳንዱ ሃቀኛ አገርወዳድ በአድሃርያን ጥይት በወደቀ ቁጥር በንጹሃን ደም አንጀታቸው እየራሰ “እሰይ፣ እሰይ” ይሉ ነበር። የሕግ፣ የስርዓት፣  የመንግሥት መጥፋት የሚታያቸው ዛሬ ነው! ሁለተኛው መስመር የሰፊው ሕዝብና የአብዮቱ ሰፈር መስመር ሲሆን፣ እርሱም በተፈጠረው ቀይ ሽብር የሚያየው የወደቁትን አብዮታዊያን ደም መበቀሉን አብዮቱን ከቅልበሳ ማዳኑንና የወደፊት እርምጃን ነው።

ይሁንናም በነዚህ በሁለት እንደሰማይና ምድር በተራራቁ አስተሳሰቦች መካከል የሚዋልሉ፣ ገና የንኡስ ከበርቴ ሸክማቸውን ሙሉ በሙሉ ያላራገፉ አብዮታዊያንም አሉ። የሰፊው ሕዝብ ነፃ ድርጊቶች፣ የሰፊው ሕዝብ የመፍጠር ችሎታ በግብር ቢታይ ንኡስ ከበርቴውን ያስበረግገዋል። ማርክስ እንዳለው ሁሉ፣ ሰፊው ሕዝብ ከንዑስ ከበርቴው በስተጀርባ በመሰለፍ ፈንታ ከፊቱ የቀደመ እለት የንኡስ ከበርቴው አብዮታዊነት ወዲያውኑ ፀሐይ እንደመታው በረዶ መቅለጥ ይጀመራል። ባንዳንድ አብዮታዊያን ዘንድ ይህ መታየት ጀምሯል። እነዚህ ጓዶች የሚጠብቁት ስህተት የማይደረግበትን፣ ያለመሰናክል በሃዲድ ላይ የሚሽከረከርን፣ ሙሉ በሙሉ በአብዮታዊያን ቁጥጥር ስር የሆነን “ንጹህ አብዮት” ነው። ነገር ግን የዚህ አይነት “ንጹህ አብዮት” የሚጠብቅ አብዮታዊ ሳያየው ይሞታል ብሏል ሌኒን። ስለሆነም፣ የኢትዮጵያ አብዮታዊያን የሰፊውን ሕዝብ ነፃ ድርጊቶችና የመፍጠር ችሎታውን ሙሉ በሙሉ በመደገፍ እነዚህ ድርጊቶችና ችሎታዎች በአብዮቱ ሰፈር ውስጥ እንዲጣመሩ እየታገሉ፣ በአብዮታዊ ሥራ ላይ የሚፈጸሙ አንዳንድ ስህተቶችን እያረሙና ከእነዚህም ስህተቶች ትምህርትን እየቀሰሙ፣ በዚያውም የፀረአብዮት ሰፈር ሰፊውን ሕዝብ በማንቋሸሽ የሚካሄደውን ዘመቻ ያጋልጡታል።

3. የሹመት ጉዳይ

ጊዜያዊ ወታደራዊ መንግሥት በቅርቡ የሰጠው ሹመት ሰፊውን ሕዝብ ሳያደናግረው አልቀረም። ነገሩ ያልተጠበቀ አይነት “ኮክቴል” ነው። ተራማጆችም፣ አድሃሪዎችም፣ ከሁለቱ ወገኖች በየትኛው ውስጥ እንደሚገኙ የማይታወቁ ሰዎችም ተሾመዋል። በሌላ በኩል ደግሞ ይሻራሉ ተብሎ ይጠበቁ የነበሩት አሁንም በስልጣን ቦታ ላይ ይገኛሉ። ይህቺ የኢትዮጵያ አብዮት በጣም ፈጣን ስለሆነች፣ በአጭር ጊዜ ውስጥ፣ ምናልባት በርከት ያሉ ተሽዋሚዎች ከአውቶቡሱ እንዲወርዱ ሳታስገድዳቸዉ አትቀርም የሚል እምነት አለን!!

ሹመትን በሚመለከተው በኩል፣ 1ኛ/ ወጣት ተራማጆችን፣ 2ኛ/ ከወዛደር ወገን የሆኑትን በኃላፊነት ቦታዎች ላይ ለማስቀመጥ /ለሞሾም/ መድፈር ያስፈልጋል። “አዋቂዎችን”፣ ተራማጅ እስካልሆኑ ድረስ፣ በእውቀታቸው እንዲያገለግሉ እንጂ፣ አመራር ውስጥ እንዲገቡ ማድረግ አያስፈልግም።

4. የቤጌምድር ሁኔታ

እነአለማየሁ ኃይሌ ነግሰው በነበረበት ሰሞን በአዲስ አበባ ከተማ ይወራ የነበረው ወሬ ኢ.ዲ.ዩ በቀናት ውስጥ ጎንደርን እንደሚይዝና መንግሥትን እንደሚያውጅ፣ ስለሆነም ከኢ.ህ.አ.ፓ ጋር እርቅን ማድረግ እንደሚያስፈልግ ነበር። ኢህአፓም በበኩሏ በየትምህርት ቤቱ ኢዲዩን ለመቋቋምና ለማሸነፍ የሚችለው ጊዜያዊ የወታደራዊ መንግሥት ሳይሆን ኢህአፓ ራሷ መሆኗን በሰፊው አስወርታ ነበር። የአድሃሪያንን ጊዜያዊ መጠናከር ያስከተለውና ለኢዲዩም አንዳንድ ተጨባጭ ድሎችን [የማይነበብ]፣የካድሬዎችና የአገርወዳድ መለዮ ለባሾች መገደልና መማረክ፣ እነሰቲትን የመሳሰሉ ስፍራዎች መያዝ ወዘተ…- ያስገኘለት በተለይ በዚያ ክፍለሃገር በመ/ቤቶችና በመለዩ ለባሹም ውስጥ አድሃሪ ቢሮክራቶች መሰግሰግ መሆኑን የአይን ምስክሮች ያስረዳሉ።

ይህን የአድሃሪ ቢሮክራቶች አሻጥር የበጌምድር ሰፊ ሕዝብ እየተቋቋመ ጠላቱን መልሶ በማጥቃትና ድሎችን በመቀዳጀት ላይ ነው። የበጌምድር ሕዝብ በቅርቡ ባገኛቸው አብዮታዊ ውጤቶች ኢዲዩንም ኢሕአፓንም በገቢር አጋልጧል። ትክክለኛው ቀስቀሳና ትክክለኛው አመራር እንደዚሁም አስፈላጊው፣ ማቴርያላዊ ድጋፍ ከተሰጠው የበጌምድር ሕዝብ በራሱ ኃይል ኢዲዩን ለመቋቋም እንደሚችል በግብር አረጋግጧል። እዚያ የተመደቡት የደርግ አባሎችና ተራማጆች በሕዝቡ ላይ በመተማመን ያስገኟቸውን ድሎች ወደሌሎች ከፍተኛ ድሎች እንዲለውጧቸው  እናበረታታለን።