ከጥቂት ወራት ወዲህ በኢትዮጵያ አብዮትና በኢትዮጵያ አንድነት ላይ የተሰነዘሩት አደጋዎች እስካሁን ከታዩት ሁሉ በላይ ከባድና እስጊ ሆነዋል። በአሁኑ ጊዜ፣ ሀገራችንና አብዮቱ በትልቅ የፖለቲካ፣ የኢኮኖሚና የማህበራዊ ኑሮ ውጥረት ውስጥ እንደወደቀና ሁኔታውም በየእለቱ እየተባባሰ እንደሚሄድ በአይናችን የምናየው እውነት ነው።

በፖለቲካ በኩል፣ ሰፊው ሕዝብ ሰብአዊና ዴሞክራሲያዊ መብቶቹን ሊቀዳጅና በሙሉ ነጻነትና በሕዝባዊ ኃይሉ በአብዮቱ ሊሳተፍ አልቻለም። እንዲያውም በአንዳንድ ክፍላተ ሀገር- በሐረርጌ፣ በባሌ፣ በሲዳሞ፣ በከፋ፣ በጎንደር- ከፍተኛ እልቂት እየደረሰበት ነው። በተለይም በሐረርጌ ሰፊው አርሶአደር ሕዝብ በአንድ ወገን ውድ አገሩን በወረሩት የሶማሊያ ወታደሮች እየተጨፈጨፈ ነው። በሌላ ወገን ደግሞ፣ የብሄር ትምክህተኝነት ነግሶ የቀድሞዎቹ የመሬት ከበርቴዎች በገፍ እየረሸኑት ነው። በነዚህ ክፍላተሀገራት የሚገኙት ሕዝባዊ ድርጅቶች – የወዛደር፣ የገበሬ፣ የቀበሌ፣ የሴቶች፣ የወጣቶች ድርጅቶች- እየፈራረሱ ናቸው።…..

በኢኮኖሚ በኩል፣ የሸቀጣ ሸቀጥ መጥፋት፣ የእህል መወደድ፣ የዋጋ መናር እና የሥራአጥ መብዛት፣ ሰፊውን ሕዝብ፣ በተለይም ሰፊውን የከተማ ሕዝብ፣ በከባድ ችግር ውስጥ ጥለውታል። ….

በማህበራዊ ጉዳይ በኩል፣ በትምህርት፣ በጤናና በሌሎችም አገልግሎቶች በብሄራዊ ዲሞክራሲያዊ አብዮት ፕሮግራም ውስጥ የተጠቀሱት ተግባሮች ምንም ያህል ከሥራ ላይ አልዋሉም።….

በዚህ ሁሉ ላይ ደግሞ፣ የአድሃሪዎች ከበባና ወረራ፣ እንደዚሁም የአብዮቱ ከውስጥ መቦርቦር በተፋጠነ እርምጃ በመካሄድ ላይ ይገኛሉ። በፊውዶ-ቡርዧው ቢሮክራሲ ውስጥ ቁልፍ ቦታዎችን የያዙ አድሃሪዎች የየራሳቸውን የቅጥረኛ ነፍሰ ገዳዮች ቡድኖች አቋቁመው፣ በደርጉም ውስጥ ሆነ ከዚያ ውጭ ያሉትን ተራማጆች ጨርሰው የመንግሥትን ስልጣን ለመያዝ አሰፍስፈዋል። ስለዚህም የጊዜው ሁኔታ ከመቼው ይበልጥ ለአብዮት ቀልበሳ እጅግ በጣም አመቺ ሆኗል።

በእንደዚህ አይነት የጠቅላላ ውጥረት ወቅት፣ የኢትዮጵያ ተራማጆችና አገር ወዳዶች ሁሉ እጅ ለእጅ ተያይዘው፣ ለሚወዷት እናት አገራቸውና ለአብዮታቸው በይፋ ለመዋደቅ መቻል ነበረባቸው። ግን በዛሬው ወቅት ህጋዊው የትግል መስክ እየመነመነና እየጠበበ በመሄዱ ይህንን የተቀደሰ ምኞት ከሥራ ላይ ማዋል ቀላል አልሆነም። ስለዚህም፣ መኢሶን አብዮቱን ትክክለኛውን ፈር ለማስያዝ፣ የአገሪቷን ብሔራዊ ነፃነት ለማስከበርና የሕዝቦችዋን አንድነት ለመጠበቅ በሚደረገው ጥረት፣ ምንም ተጽእኖ በማይኖረው መንገድ፣ የበኩሉን ለማበረከት በማለት በህጋዊ ሥራ ያሰማራቸውን አንዳንድ ጓዶች ወደ ህቡእ መስክ ለማዛወር ወስኗል። መኢሶን ይህንን እርምጃ እንዲወስድ ከተገደደበት ምክንያቶች አንዳንዶቹ የሚከተሉት ናቸው።

አንደኛ። በጥርና በየካቲት ወራት አብዮቱ ከተከላካይነት ወደ አጥቂነት በተሸጋገረበት ወቅት፣ ሰፊው ሕዝብ ነፃ አብዮታዊ እርምጃዎችን በመውሰዱ፣ በአንድ በኩል የውስጥ ፀረአብዮት ኃይሎች መፍጨርጨር ሲገታ፣ በሌላ በኩል ደግሞ፣ እነዚህ ነጻ አብዮታዊ እርምጃዎች ጊዜያዊ ወታደራዊ መንግሥትን አስደንግጠውት ነበር። ስለዚህም፣ ደርጉ የንኡሰ ከበርቴውን መደብ ወላዋይነት በማሳየት፣ የቀበሌዎችን ማስታጠቅ አቆመ፣ እንዲያውም በሚሰጠው ተስፋ አስቆራጭ ፕሮፖጋንዳ የቀበሌዎች ሞራል ሲሰበር፣ በወሰዳቸው አንዳንድ እርምጃዎች ደግሞ በቀበሌ መሪዎችና በወዛደሮች ላይ ጭቆናዎች ተፈጸሙ። ከመጋቢት ወር ጀምሮ በአዲስ አበባ እና በሌሎችም ከተሞች አብዮቱ እንደገና ወደ ተከላካይነት እንዲዘቅጥ ተደረገ። ከዚህም የተነሳ ሀገራችን በአጭር ጊዜ ውስጥ ልትተካቸው የማትችል በርከት ያሉ ቆራጥና ታታሪ አብዮታዊያንና አገርወዳጆች በአድሃርያን ጥይት ወድቀዋል፤ እየወደቁም ናቸው።

ሁለተኛ። አብዮቱ ከአጥቂነት ወደ ተከላካይነት ከተመለሰበት ምክንያቶች አንዱ፣ የጊዜያዊ ወታደራዊ አስተዳደር ደርግ እምነቱን በሰፊው ሕዝብ እና በተራማጆች ላይ ሳይሆን፣ ይበልጡን በፊውዶ-ቡርዧው ቢሮክራሲ ላይ በመጣሉ ነው። በዚህም ሁኔታ በመጠቀም፣ አድሃሪዎች በተራማጆች መካከል አለመተማመን እንዲሠፍን አድርገው ተራማጆችን ከፋፍለዋል፤ መኢሶንን በጊዜያዊ ወታደራዊ አስተዳደር ደርግ ለማስመታት ሞክረዋል፤ የዛሬውም ሥራቸው በዚሁ የማስመታትና የመምታት አላማ ዙሪያ እየተውጠነጠነ ነው። እንዲያውም በፊውዶ-ቡርዧው ቢሮክራሲ ውስጥ ያሉ፣ ከሁሉ አድሃሪ የሆኑ ቡድኖች፣ የታወቁና በህጋዊ ሥራ የተሰማሩ የመኢሶን ጓዶችን አንድ በአንድ እየገደሉ ለመጨረስ እንደወሰኑና ይህንንም ፋሽስታዊ አላማቸውን ከሥራ ላይ ማዋል እንደጀመሩ መኢሶን ደርሶበታል። በተጨማሪም፣ በሐረርጌ፣ በከፋ፣ በሸዋና በሌሎችም ቦታዎች ሀቀኛ ተራማጆች ይታሰራሉ፣  ይረሸናሉ። አድሃሪዎች ሃቀኛ ተራማጆችንና ሰፊውን ሕዝብ ለመነጣጠል የሚያደርጉትን መፍጨርጨር በከፍተኛ ደረጃ አፋፍመውታል።

ሶስተኛ። መኢሶን በአባልነት የሚገኝበትን “የኢትዮጵያ ማርክሲስት-ሌኒኒስት ድርጅቶች ህብረትን” የፈጥሩት አንዳንድ ድርጅቶችም በነዚህ የአድሃሪዎች ሴራዎች ላይ ነቅተው፣ ዋናና መለስተኛ ቅራኔዎችን ለይተው፣ ለሃቀኛ  ህብረት በመሰለፍ ፈንታ በአድሃሪዎች ወጥመድ ውስጥ በመውደቅ፣ በድርጅታችን ላይ የስም ማጥፋትና የማጥላላት ዘመቻ አካሂደዋል፤ እያካሄዱም ናቸው። አንዳንዶቹም ራሳቸው ፈጥረው የሚነዙትን የስም ማጥፊያ ፕሮፓጋንዳ ራሳቸው ያመኑበት ይመስላል። ስለዚህም፣ ህብረቱ በዲሞክራሲያዊ አሰራርና በቁም ነገሮች ላይ የተመሰረተ መሆኑ ቀርቶ፣ አንድም እርምጃ ወደፊት ለመራመድ እንዳይችል ተሰናክሎ፣ “የማይተማመን ባልንጀራ በየወንዙ ይማማላል” እንደሚባለው ሁሉ በወረቀት ላይ የሚቀሩ ፕሮግራሞችን ብቻ ደጋግሞ በመንደፍ ተወስኗል።

አራተኛ። የአብዮታዊት ኢትዮጵያን ህልውና ለማስጠበቅና አብዮቱ ሥር እንዲሰድ ይጠቅማሉ በማለት፣ በህጋዊ ሥራ በተሰማሩት ጓዶች አማካይነት መኢሶን ለጊዜያዊ ወታደራዊ አስተዳደር ደርግ እና ለተራማጆች ህብረት በየወቅቱ ያቀረባቸውን ሀሳቦች በቅን መንፈስና ከአብዮቱ አንጻር በመመለከት ፈንታ፣ ሀሳቦቹ ከመኢሶን በመንጨታቸው ብቻ ደርጉና አንዳንዶቹ ድርጅቶች በጥርጣሬ ዓይን እያዩዋቸው ከሥራ ላይ ሳይውሉ በመቅረታቸው ለውጥረቱ መፍትሄና ለአብዮቱ የተፈለገውንና የሚጠበቀውን ያህል አስተዋጽኦ ማድረግ ያልተቻለም።

ለምሳሌ ያህል፣ አሁን በየቦታው ደሙን በማፍሰስ እና አጥንቱን በመከስከስ ላይ የሚገኘውን “ሕዝባዊ ሠራዊት” በሚመለከተው በኩል፣ አብዮታዊ አመራር እንዲኖረው፣ ብቁ የሆኑ የፖለቲካ እንቂዎች ከላይ እስከታች በብዙ ሺህ እንዲሳተፉበት፣ በተለይም ደግሞ ወደየመጣበት ተመልሶ ፀረአብዮትን በሚያውቀው አካባቢ እንዲቋቋም የቀረበው ሐሳብ ምንም ተቀባይነት ሳያገኝ በመቅረቱ፣ ሰራዊቱ ዛሬ በብዙ ችግሮች ውስጥ ወድቋል። በተጨማሪም መንግሥት ሰፊው ሕዝብ በማመን በወቅቱ ስላላስታጠቀው ሀገሪቷ በምሥራቅ በኩል እስከ መወረር ደርሳለች። ቢሮክራሲን በሚመለከተው በኩል፣ በየሚኒስቴሩ፣ በየክፍለሃገሩና በጦር ኃይሎች ውስጥ ያሉትን አድሃሪዎች በወቅቱ በማስወገድ ፈንታ፣ ደርግ ስላቀፋቸው፣ በአሁኑ ወቅት አድሃሪው ቢሮክራሲ አንሰራርቶ ጠቅላላውን ሁኔታ ለቅልበሳ በማመቻት ላይ ይገኛል። ለኤርትራም ችግር፣ ፖለቲካዊ መፍትሄን በማስቀደም ፈንታ፣ “ተገንጣዮቹን አንበርክከን በኋላ የፖለቲካ ውይይት እናካሂዳለን” በሚል አስተሳሰብ በመመራቱ፣ ደርጉ አገሪቷንና አብዮቱን ወደማያዋጣ ጎዳና በመውሰድ ላይ ይገኛል።…

ሌሎችንም ምሳሌዎች ለመጥቀስ በተቻለ ነበር። ነገር ግን ደርግና በፍፁም አድርባይነት የታወሩት አንዳንድ የህብረቱ ድርጅቶች መሪዎች፣ ከጥቂት ወራት ወዲህ ተጨባጭ ሁኔታና የሰፊውን ሕዝብ ጥያቄዎች ለመከታተልና ለመረዳት በመሞከር ፈንታ፣ ድርጅታችንን ያጠቁና ያደከሙ እየመሰላቸው፣ መኢሶን የሚያቀርባቸውን ሀሳቦችና መፈክሮች በመቃወም ላይ ብቻ ስላተኮሩ፣ ኃይላቸውን ሁሉ ሰብስበው አብዮቱን ለማራመድና የአገሪቱን ክብርና አንድነት ለመጠበቅ በሚደረገው ጥረት ላይ ለማዋል አልቻሉም።

እላይ ከተጠቀሱት ምክንያቶች የተነሳ፣ መኢሶን የቀየሰውንና እስካሁንም ሲሰራበት የቆየውን “አብዮታዊ ሂስ” መመርያውን ያላንዳች ተፅዕኖ ከሥራ ላይ ሊያወል የማይችልበት ሁኔታ ተፈጥሯል። ስለዚህም፣ መኢሶን አሁንም የሚያምነበትን “የአብዮታዊ ሂስ” መመርያውን ያላንዳች ተጽዕኖ በሥራ ለመተርጎም ይቻለው ዘንድና፣ ስለ ኢትዮጵያ አብዮትና ስላገሪቷ አንድነት፣ ስለ ብሔራዊ ነፃነትና ስለ ወደፊቱ ትግል ያለውን አስተሳሰብ ለሰፊው ሕዝብ ለማስተጋባት ያመቸው ዘንድ፣ እስከዛሬ በህጋዊ የትግል መስክ ያሰማራቸውን አንዳንድ ጓዶቹን በህቡዕ አሰማርቶ ለመታገል መርጧል።